बेलायतय् न्हापांखुसी बिस्काः जात्रा

येँ (नेपालभाषा टाइम्स)- नेपालय् जूगु बिस्काः जात्राय् अप्पां कयेकाः ल्वापु जूसां बेलायतया लण्डनय् धाःसा शान्त व न्ह्यइपुक बिस्काः जात्रा न्यायेकूगु दु । थुगुसी बेलायतया लण्डनय् थुगुसी न्हापांखुसी बिस्काः जात्रा न्यायेकूगु खः ।

बेलायतय् च्वंपिं नेवाःतय्गु संस्था पासा पुचः गुथि यूकेया ग्वसाः व गुथिया साउथ इष्ट लण्डन कचाया संयोजनय् थुगुसी बेलायतया प्लमस्टिडस्थित एशियन कम्युनिटी सेन्टरय् अन च्वंपिं नेवाः लगायतया नेपाली समुदाय जानाः थ्व जात्रा याःगु खः । उकी बेलायतया निंतिं नेपाली राजदूत ज्ञानचन्द्र आचार्यं नं ब्वति कयादीगु खः ।

जात्राय् भैलःद्यः व भद्रकालीया निगू बिस्कं बिस्कं रथ हे दयेकाः सालेगु ज्या समेत याःगु खः । अन हरेक निदँय् याइगु नेवाः मुना ज्याझ्वलय् तुं लाकाः बिस्काः जात्रा न्यायेकूगु खँ गुथिया नायः ओजेश सिंहं कनादिल । लिसें जात्राजःछि धिमय् थानाः प्याखं हुलेगु नेवाः नसात्वँसा नयेगु ज्या नं जूगु खः । जात्राया संयोजक कचाया अध्यक्ष माधवलाल श्रेष्ठं कनादी कथं जात्राय् ल्याय्म्ह ल्यासे व मस्त समेत आपालं मनूतय् सहभागिता दुगु खः ।

गुथिया नायः सिंहं कनादी कथं ख्वपय् थें लण्डनय् नं प्यन्हु तक थ्व जात्रा न्यायेकेगु ग्वसाः दु । चैत्रया लिपांगु न्हि ख्वपय् यःसिं थनी थें लण्डनय् नं यःसिं थनेगु तयारी जुयाच्वंगु खँ नं वय्कलं कनादिल । लण्डनय् मोहनि, स्वन्ति, न्हूदँ लिसें यँयाः न्यायेका वयाच्वंगु दुसा बिस्काः धाःसा थुगुसी न्हापांखुसी न्यायेकूगु खः । थुकिं न्हूगु पुस्तायात नेवाः संस्कृतिबारे जानकारी बीगु आशा यानातःगु दु । थौंकन्हय् नेपालय् ख्वपय् नं बिस्काः जात्रा न्ह्यानाच्वंगु दु ।

सम्बन्धित बुखँ

LEAVE YOUR COMMENTS