ने. सं. ११४४ कौलाथ्व चौथी -

मानन्धर संघया रीतिथिति गोष्ठि

येँ- केन्द्रीय मानन्धर संघ सामाजिक सेवा उपसमितिया ग्वसालय् वंगु शनिवाः रीतिथिति गोष्ठि जुल । मानन्धर समुदाय दुने जन्मनिसें मृत्यु संस्कार व थीथी भ्वजय् थौंया इलय् यायेमाःगु आवश्यक सुधारयात कयाः उगु गोष्ठि जूगु खः । संघया सभापति मनोजकुमार मानन्धरया सभापतित्वय् उपसभापति बद्रीनारायण मानन्धरं लसकुस यानादीगु खः ।

गोष्ठिइ प्रा. डा. त्रिरत्न मानन्धरं मानन्धर संघपाखें करिब स्वंगू दशक न्ह्यः लागू यानातःगु १४ गू बुँदाया नियमय् परिमार्जन यायेमाःगु विषययात बुँदागत रुपय् न्ह्यब्वयादीगु खः । अथे हे संघया पुलांम्ह उपसभापति हरिओम मानन्धरं मगाःमचाःगु, सुधार यायेमाःगु, हिला यंकेमाःगु व थौंया इलय् समयसापेक्ष जुइकथंया व्यवहार याना वनेमाःगु बारे नुगः खँ तयादीगु खः ।

गोष्ठिइ न्ह्यब्वःगु नियम परिमार्जन व सुधारया प्रस्तावयात कयाः थीथी त्वाः, गुथि, खलःपाखें प्रतिनिधित्व यानाः झायादीपिं भाजु मय्जुपिंसं नं थःथःगु सुझाव बियादीगु खः । ज्याझ्वलय् राज साय्मि (थँहिति), ध्रुवनारायण मानन्धर (न्हूसाः), विक्रमदास मानन्धर (तःखाछेँ), डा. सुमित्रा मानन्धर गुरुङ, धर्मकृष्ण मानन्धर (भिंद्यः गुथि), प्रतिसरा साय्मि (दैसाः), डा. मदन मानन्धर (न्हूसाः), राजेन्द्र मानन्धर (श्रीपंचमि गुथि), उत्तम साय्मि (चस्वांद्वँ) लगायतं मानन्धर समुदायया सामाजिक रीतिथितिइ हयेगु माःगु सुधारया पक्षयात कयाः सुझाव बियादीगु खः ।

संघया पुलांम्ह उपसभापति लक्ष्मीदास मानन्धरं न्हापा थःपिं हे जानाः दयेकागु नियम थौंया इलय् सुधार यायेमाःगु आवश्यक जूगु खँ कुलादिसें न्हूगु नियम हयाः उकियात कार्यान्वयन यायेगु ज्याय् मानन्धर समुदाय न्ह्यचिलेमाः धयादिल । ज्याझ्वलय् उपसमितिया संयोजक वसन्त मानन्धरं गोष्ठिया आवश्यकता बारे जानकारी बियादीगु खः ।