उपप्रमुखपाखें सम्पदा पुनःनिर्माण अवलोकन
येँ(नेपालभाषा टाइम्स)÷ येँ महानगरपालिकाया उपप्रमुख सुनिता डंगोलं नरलय् पुनःनिर्माण जुयाच्वंगु सम्पदाया भौतिक अवस्था बारे जानकारी कयादीगु दु । येँ महानगरपालिका अनुगमन समितिया संयोजक तकं जुयाच्वनादीम्ह उपप्रमुख डंगोलं नरय् पुनःनिर्माण जुयाच्वंगु थीथी सम्पदाया भौतिक अवस्थाया अनुगमनलिसें जानकारी कयादीगु खः ।
उपप्रमुख डंगोलं नरलय् पुनःनिर्माण जुयाच्वंगु धन गणेश परिसरय् च्वंगु सतः, मालीगामय् च्वंगु मय्ति अजिमाया द्यःछेँ अनुगमन यानादीगु खः । पुनःनिर्माण जुयाच्वंगु सम्पदाया निर्माण शैली, पुनःनिर्माणय् प्रयोग जुयाच्वंगु निर्माण सामग्री, कला, शील्प, अमूर्त पक्ष आदि बारे अनुगमन यानादीगु खः ।
उपप्रमुख डंगोलया नेतृत्वय् वंगु अनुगमन पुचःयात उगु इलय् सम्बन्धित गुथिया गुथ्याः व पुजारीतसें पुनःनिर्माण जुयाच्वंगु सम्पदाया थीथी पक्ष बारे अवगत याकूगु खः । सम्पदाया पुनःनिर्माणय् जुयाच्वंगु प्रगतिया बारे जानकारी कियादीसें समितिया संयोजकलिसें उपप्रमुख डंगोलं पुनःनिर्माणया ज्याय् उपभोक्ता समिति सक्रिय जुइगु सबल पक्ष खः धासें मौलिक नेवाः पहलं निर्माण जुइगु सम्पदा येँ देय्या पहिचानलिसे स्वानाच्वंगु स्मारक खः धयादिल । ‘परम्परागत विधिया पुनःनिर्माण शैली अनुकरण योग्य जू’, उपप्रमुख डंगोलं धयादिल ।
सहरी योजना आयोगया उपाध्यक्ष डा. सुमननरसिंह राजभण्डारीं पुनःनिर्माण योजनाय् क्वःछिनातःगु शैलीयात नालाकाःगु खनेदु धासें थुकथं पुनःनिर्माण याइगु संरचनां नेवाः संस्कृति व मौलिकतायात पुस्तान्तरण यायेत ग्वाहालि जुइ धयादिल ।
येँ मपा ६ वडाअध्यक्ष वीरेन्द्र प्रजापतिं उपभोक्ता समितिपाखें पुनःनिर्माणया अनुगमन यायेगु ज्यां गुणस्तर सुनिश्चित जुइ धासें निर्माण पक्षं नं द्वंकेगु थाय् दइमखु धयादिल । लिसें वय्कलं निर्माण गुणस्तरय् नं उखेथुखे यायेगु सम्भावना मदइगु व गुगुं कारणं द्वंगु जुल धाःसा उकियात भिंकेगु ह्वःताः नं दइ धयादिल ।
२०७२ सालया भुखाचं जीर्ण जूगु द्यःछेँ ०७७ सालय् साइतय् थुनाः उगु हे दँया मंसिरय् शिलान्यास यानाः पुसनिसें ज्या शुरु याःगु खःसा ०७८ मंसिरय् निर्माण क्वचायेकूगु खः । अथे हे द्यः व द्यः खः तयेगु याना वयाच्वंगु मय्ति अजिमाया द्यःछेँ पुनःनिर्माणया ज्या ०८० असारं शुरु याःगु खःसा असोजय् क्वचायेगु लक्ष्य कयातःगु दु ।
LEAVE YOUR COMMENTS