सः छगू फरक अभिव्यक्तिया १० गू श्रृंखला

यल – लय्पतिकं न्ह्याका वयाच्वंगु साहित्यिक ज्याझ्वः सः छगू फरक अभिव्यक्तिया झिगूगू श्रृंखला वंगु शनिवाः क्वचाल । सः छगू फरक अभिव्यक्तिया नामं लय्पतिकं न्हापांगु शनिवाः स्वम्ह चिबाखँ ब्वँमियात ब्वनाः थुकथं श्रृंखलावद्ध रुपं थुगु ज्याझ्वः न्ह्याका वयाच्वंगु खः ।
वंगु शनिवाः जूगु झिक्वःगु श्रृंखलाय् केदार सितु, रासा व स्नेह साय्मितं थःथःगु चिबाखँ वाचन यानादीगु खः ।

ज्याझ्वः चिबाखँ वाचनया निंतिं ब्वनातःपिं स्वम्हं श्रष्टायात संस्थाया नरेश अमात्यं लसकुस यानादीगु खः । ज्याझ्वलय् वाचन जूगु चिबाखंयात कयाः साहित्यकार डा. पुष्पराज राजकर्णिकारं समीक्षात्मक टिप्पणी यानादीगु खः ।

ग्वसाः खलःया छम्ह दुजः नापं कवि सुधीर ख्वबिं चिबाखं वाचन यानादीपिं स्वम्हं स्रष्टायात व ज्याझ्वलय् ब्वति कायेत वइपिंमध्ये छम्हेसित गोलाप्रथाकथं बीगु मतिनाया चिं दिव्या ताम्राकारयात लःल्हानादीगु खः । ज्याझ्वलय् स्वम्हं स्रष्टायात मोक्षबहादुर अमात्यं खादां क्वखायेकादीगु खः ।