ने. सं. ११४३ चौलाथ्व सप्तमी -

आचारसंहिताया बैठकय् होहल्ला

येँ – निर्वाचन आयोगं स्थानीय तहया निर्वाचन सम्बन्धी आचार संहिता पालना याये धकाः राजनीतिक दलतय्गु लिखित प्रतिवद्धता काःगु दु । आयोगं निर्वाचनया नितिं दर्ता जूगु दलतय्त म्हिगः सःताः आचार संहिता उल्लंघन याये मदइगु धासें उकिया प्रभावकारी कार्यान्वयनया नितिं प्रतिबद्धता काःगु खः ।

निर्वाचनय् ब्वति कायेत आयोगय् दर्ता जूगु ७९ गू राजनीतिक दलया प्रमुख, पदाधिकारी व प्रतिनिधितय्सं आचार संहिताय् हस्ताक्षर यानाः पूर्ण पालना यायेगु प्रतिबद्धता प्वंकूगु खः । तर प्रमुख प्रतिपक्षी दल नेकपा एमालें धाःसा प्रतिवद्धताय् हस्ताक्षर मयाः ।

एमालेया कानुन विभागया प्रमुख रमेश बडाल व निर्वाचन विभाग उपप्रमुख निरज आचार्यपिं आयोगय् वंगु खःसां वय्कःपिंसं प्रतिवद्धताय् हस्ताक्षर धाःसा यानामदी । वय्कःपिंसं आचार संहिता बारे बांलाक सहलह हे मयासे आयोगं लिखित प्रतिवद्धता कायेत्यन धासें आपत्ति प्वंकादीगु खः ।

आयोगं आचार संहिता बारे सहलह यायेगु धकाः बैठक सःताः लिखित प्रतिवद्धता कायेगु ज्या यात धकाः मेमेगु दलतय्सं नं विरोध याःगु खः । थुकिं यानाः बैठकय् ताःहाकः होहल्ला जूगु खः । प्रमुख आयुक्त दिनेश थपलियां दलया नेतातय्त फ्यतुनाः खँ तयादिसँ धकाः इनाप याःगु खःसां माने मजुसे छुं नेतातय्सं बैठकय् नाराबाजी समेत याःगु खः । चीधंगु दलया नेतातय्सं सत्तारुढ व तःधंगु दलया आदेशय् आयोग न्ह्याःवंगु धासें विरोध प्वंकूगु खः । यक्व होहल्ला जूगुलिं थज्याःगु माहौलय् हस्ताक्षर याये फइ मखु धासें एमालेया प्रतिनिधितय्सं हस्ताक्षर मयाःगु खः ।

थ्व स्वयां न्ह्यः आयोगं दलत लिसे सहलह यानाः निर्वाचन आचार संहिता–२०७८ जारी याःगु खः । उगु हे आचार संहिताया प्रभावकारी कार्यान्वयन राजनीतिक दलतय्गु प्रतिबद्धता कायेत हस्ताक्षर याकूगु खँ आयोगया प्रवक्ता शालीग्राम शर्मा पौडेलं कनादीगु दु । आचार संहिता थ्व स्वयां न्ह्यः हे राजपत्रय् नं पिदनेधुंकूगु दु ।

आचार संहिताया प्रभावकारी कार्यान्वयनय् हस्ताक्षर यायेधुंकाः कांग्रेसया उपसभापति पूर्णबहादुर खड्कां पत्रकारतय्त प्रतिक्रिया बिसें आयोगं थ्व स्वयां न्ह्यः हे निर्वाचनय् ब्वति काइगु दलतलिसे सहलह यानाः आचार संहिता तयार याःगु खः धासें उकी प्रतिवद्धता कायेगु पुलांगु हे अभ्यास खः धयादिल । आयोगं वहे प्रक्रिया कथं थुगुसी नं आचार संहिताया प्रभावकारी कार्यान्वयनया नितिं प्रतिवद्धता काःगु खः धासें वय्कलं छुं पासापिंसं उकिया बारे जिज्ञासा तःगु व आयोगं उकियात स्पष्ट यायेधुंकाः फुकस्यां प्रतिवद्धता पत्रय् हस्ताक्षर यानादीगु खँ कनादिल ।

निर्वाचन आचार संहिताय् चुनाव ल्वाइम्ह उम्मेदवार स्थानीय तहया छुं पदय् दुसा राजीनामा बियाः जक चुनाव ल्वाये दइ धकाः तयातःगु बुँदाय् एमालें आपत्ति प्वंका वयाच्वंगु दु । थ्व बुँदा बारे बिचाः यायेगु जुइ धकाः कांग्रेस नेतातय्सं नं धाःगु दुसां बुँदा धाःसा यथावत कायम दनिगु खँ धाःगु दु ।