अन्ततः सार्क क्षेत्रया तःधंगु वाम शक्ति छिन्नभिन्न

येँ- अन्ततः एमाले व माओवादी केन्द्र विभाजन जुयां तुं त्वःतल । थ्व पार्टी एकीकरण जुयाः सरकार गठन याःगु इलय् थ्वयात दक्षिण एशियाया हे दकलय् तःधंगु कम्युनिष्ट पार्टी धइगु उपमा बिउगु खः । तर थ्व पार्टीयात प्राप्त जूगु थुगु उपमा धाःसा ताःई टिके जुइ मफुत ।

नेपाःया वामपन्थी राजनीतिया विश्लेषकतय् बिचाः कथं नेकपा विभाजन जुयाः हानं एमाले व माओवादी केन्द्र तुं जूवंगु थ्व घटनायात ओली व दाहालया ल्वापु कथं जक थुइकेगु उचित जुइ मखु । थुकिया लिउने अन्तर्राष्ट्रिय चलखेल समेत दयेफुगु अनुमान उमिसं याना हःगु दु ।
एकीकृत नेकपायात राजनीतिक रुपं विभाजन यायेत जूगु कुतः असफल जुइवं मेगु हे लँपुपाखें जूसां थुकियात विभाजन यानां तुं त्वःतूगुलिं थुकिया लिउने तःधंगु हे राजनीतिक चलखेल जूगु दयेमाः धइगु नं विश्लेषण यायेत थाकु मजू ।

लुमंकेबहः जू, एमाले व माओवादी केन्द्र छप्पँ यायेगु लागिं उगु इलय् जःलाखःला देय् चीन दकलय् सक्रिय जूगु खः । वंगु पुस महिनाय् प्रधानमन्त्री केपी ओलीं संसद भंग याःगु इलय् नं चिनियाँ प्रतिनिधि मण्डल हे नेपाः वयाः निगू पार्टीयात मिले यायेगु कुतः याःगु खः । उगु इलय् चीनं संसद बचे यायेगु स्वयां नं एमाले व माओवादीया एकता बचे यायेत विशेष कुतः याःगु खः ।

संसद पुनस्र्थापना जुइवं नेकपायात हानं एकीकरण याइपिनि कुतः हानं तीव्र जुया वल । तर उगु कुतलं सफलता ल्हातय् लाके न्ह्यः हे सर्वोच्च अदालतं पार्टी विभाजनया राजनीतिक फैसला याना बिल ।

नेकपा कम्युनिष्ट पार्टीयात एकीकृत यायेगु ज्याय् चीनया ल्हाः दुगु व चीनं उकी ल्हाः तःगुया कारण एमसीसीयात असफल यायेत खः धइगु विश्लेषण दु । आः नेपाल कम्युनिष्ट पार्टीया थ्व एकता त्वाःदःगुया अर्थ नेपाःया आन्तरिक राजनीतिइ थःगु भूमिका क्यनेगु चिनियाँ कुतः विफल जूगु खः धकाः नं थुइका हःगु दु । नेपाःया आन्तरिक राजनीतिं चीनयात अलग यायेगु थ्व कुतःया लिउने एमसीसीया साझेदार देय्त अमेरिका व भारत दयेमाः धइगु खँय् शंका मदु ।

लिपांगु इलय् नेपालय् विकसित जूगु थ्व राजनीतिक घटनायात कयाः आः तक चीन व भारतं छुं हे प्रतिक्रिया बिउगु मदु । अथे खःसां भारतलिसे सतीपिं धइगु द्वपं दुपिं जसपाया छुं नेतातय्त प्रम ओलीलिसे जानाः सरकार दयेकेगु धकाः खँल्हाबल्हा याःगुलिं धाःसा थ्व चलखेलया भू सी दया वःगु विश्लेषण नं याना हःगु दु ।

सम्बन्धित बुखँ

LEAVE YOUR COMMENTS