श्रीलंकाय् संकटकाल, सामाजिक संजाल नं बन्द

एजेन्सी- खाद्यान्न व इन्धनया अभावया कारणं तःधंगु विरोध प्रदर्शन सुरु जुइवं श्रीलंकाय् ३६ घौया निंतिं कफ्र्यू घोषणा याःगु दु । थुकिया लिसें सरकारं सामाजिक संजालय् नं पंगः थनाबिउगु दु । राष्ट्रपति गोटाबय राजपक्षं सम्बन्धित निकायया लिखित अनुमति मकासे सुं नं सतक, पार्क, रेल वा समुद्री तटय् वने मदइकथं प्रतिबन्ध तःगु खः ।

शनिवाः सनिलय्निसें कफ्र्यू लागु याःगु श्रीलंकाय् फेसबुक, ट्विटर व इन्स्टाग्राम थेंज्याःगु सामाजिक संजाल चायेके मफइ कथं यानाबिउगु खः ।
बिहिवाः आन्दोलनकारीतय्सं राष्ट्रपतिया राजपक्षया निजी निवास पिने सवारी साधनय् मि तयाबिइवं थप विरोध प्रदर्शन मजुइमा धकाः कडा प्रतिबन्ध तःगु खः । सरकारं आः श्रीलंकाय् संकटकाल घोषणा यायेधुंकूगु दुसा आः सेना परिचालन यायेधुंकूगु दु । सेनायात पक्राउपूर्जी मबिसे शंकास्पद मनूतय्त ज्वनेत आदेश बियातःगु दु ।

श्रीलंकाय् विदेशी मुद्राया अभावया कारणं तच्वःगु आर्थिक संकट खने दयाच्वंगु दु । विदेशी मुद्रा मदुगुलिं इन्धन न्याये फयाच्वंगु मदुसा मत नं उत्पादन याये फयाच्वंगु दु । इन्धन, खाद्यान्न व वासःया अभाव जुइवं सर्वसाधारण सतकय् कुहां वःगु खः ।

राष्ट्रपति राजपक्षया कोलम्बोय् च्वंगु निवासपिने शान्तिपूर्ण विरोध सुरु जूगु खःसां प्रहरीं अश्रुग्यास कयेकेगु व लखं छ्वाकेगु यायेवं प्रदर्शन हिंसात्मक जूवंगु खः ।