खामेनीयात श्रद्धाञ्जली देछाय् थाय् अमेरिका विरोधी नारा
तेहरान – इरानया मदुम्ह सर्वोच्च नेता आयतोल्लाह अली खामेनीया राजकीय अन्त्येष्ठिया निंतिं थ्व इलय् अन्तिम श्रद्धाञ्जली देछायेगु ज्याझ्वः जुयाच्वंगु दु । थ्व झ्वलय् राजधनी तेहरानय् लखौंया जनसागर मुनाच्वंगु इरानी संचार माध्यमं न्ह्यथंगु दु ।
खुन्हु तक न्ह्याइगु अन्त्येष्ठि ज्याझ्वःया न्हापांगु व निन्हुया दिं शुक्रवाः व शनिवाः तेहरानय् लखौं मनू मनाच्वंगु दु । खामेनीयात अन्तिम श्रद्धाञ्जली देछायेत राजधाी तेहरानय् च्वंगु ‘इमाम खुमेनी ग्रान्ड मुसल्ला’ मस्जिदय् असाधारण इरानी जनसागर कुहां वयाच्वंगु दु ।
खामेनीयात अन्तिम श्रद्धाञ्जली देछायेत मुनाच्वंपिं लखौंया इरानीतय्सं मदिक्क अमेरिका विरोधी नारा थ्वये काच्वंगु दु । इमिसं खामेनीया किपा ज्वनाः मदिक्क ‘अमेरिका मुर्दावाद’ व ‘इजरायलय् दैवी वज्रपात’ थेंज्याःगु नारा थ्वये काः बदला कायेमाःगु माग यानाच्वंगु दु ।
वंगु फेब्रुअरी २८ य् अमेरिका व इजरायलं याःगु आक्रमणय् लानाः सर्वोच्च नेता खामेनीलिसें वया मेपिं छेँजःपिं सीगु खः । खामेनी लिसें छेँजःपिनिगु सीम्ह नं ताबुतय् तयाः इरानी ध्वाचं फयेमाः मस्जिदया दबुलिइ तयातःगु दु । खामेनीया सीम्ह तयातःगु ताबुत खनेवं लखौं इरानी हिहिलना ख्वःगु खः ।
इरानी अधिकारीतय्सं थ्व आतकया हे दकलय् तःधंगु जनसागर जुइफुगु व मुक्कं छवाःया ज्याझ्वलय् निगू करोड मनूया सहभागिता दइगु अनुमान याःगु दु । वंगु शुक्रवाःनिसें खामेनीया सीम्ह अन्त्येष्ठिया निंतिं मस्जिदय् तयातःगु दुसा थनिंनिसें अन्तिम यात्रा याइगु जूगु दु । तेहरानं शुरु जुइगु खामेनीया शवयात्रा जुलाई ७ य् कोम, जुलाई ८ य् इराकया नजफ व कर्बला जुयाः दकलय् लिपा जुलाई ९ लय् इरानया निगूगु तःधंगु सहर मशहदय् च्वंगु ‘इमाम रजा दरगाह’ य् राजकीय सम्मानलिसें समाधिस्थ याइगु ज्याझ्वः दु ।
LEAVE YOUR COMMENTS