यल मनपाय् छु पार्टीपाखें सु दनी थें ?

यल- न्ह्यःने वयाच्वंगु स्थानीय चुनावय् उम्मेदवार जुइगु लागिं यल महानगरपालिकाय् नं चहलपहल शुरु जूगु दु । थ्व झ्वलय् थीथी पार्टी दुने सु उम्मेदवार जुइगु धकाः मनू मालेगु ज्या तीव्र रुपं न्ह्याना वःगु दु ।

नेपाली कांग्रेस दुने वर्तमान मेयर चिरिबाबु महर्जनयात हे हानं टिकट बीगु चर्चा दुसां मेपिं नेता कार्यकर्तां नं दावी याना हःगु दु । थुकी दकलय् न्ह्यःने पुलांम्ह कार्यकर्ता भरतलाल न्याछ्योंया नां वयाच्वंगु खँ सूत्रं धाःगु दु । वि.सं. २०३६ सालंनिसें कांग्रेस कार्यकर्ता जुयाः सक्रिय जुयादीम्ह न्याछ्यों यलया पुलांपिं कांग्रेस कार्यकर्ता मध्ये लाः । आः तक पार्टीपाखें गनं नं अवसर मकाःनिम्ह जुयाः वय्कःयात थुगुसी थुगुसी टिकट बीगु सम्भावना अप्वः दुगु खँ स्थानीय कार्यकर्तातय्सं धाःगु दु ।

मेखे नेकपा (एमाले) पाखें पुलांम्ह हे उम्मेदवार हरिकृष्ण व्यंजनकारयात थुगुुसी नं उम्मेदवार दयेकेफुगु खँ सूत्रं धाःगु दु । अन वय्कःलिसे उपमेयरया उम्मेदवारकथं आस्था (मन्जली) शाक्यया नां वयाच्वंगु दु । शाक्य माओवादीपाखें एमालेय् दुहां वःम्ह खः । न्हापाया चुनावय् व्यंजनकार कम जक भोटं पराजित जूगु खः ।

थ्वहे झ्वलय् यल मनपा वडा नं. १० पाखें गुक्वः तक वडा अध्यक्ष जुयादीधुंकूम्ह वर्तमान वडा अध्यक्ष नरसिंहलाल व्यंजनकार हानं छक्वः उम्मेदवार जुयादीगु खँ सीदुगु दु । ८१ दँ दुम्ह व्यंजनकारया थ्व १० क्वःगु उम्मेदवारी जुइ । वि.सं. २०४९ स छक्वः कांग्रेसपाखें वडा अध्यक्ष त्याःम्ह वय्कः वयां लिपा निर्विरोध हे वडा अध्यक्ष निर्वाचित जुया वयाच्वंगु दु ।

सम्बन्धित बुखँ

LEAVE YOUR COMMENTS