दीपक मनाङे जेल वनीगु

येँ– नकतिनि जूगु प्रदेश सभाय् मनाङे ख पाखें त्याःम्ह डन दीपक मनाङे आः संसदय् मखुकि जेलय् वनेमालीगु जूगु दु । सर्वोच्च अदालतं मनाङेयात २०६९ सालय् तत्कालिन पुनरावेदन अदालतं न्यादँया जेल सजाय न्यंकातःगु सदर यानाबीवं आः मनाङे जेल वनेमाली जूगु दु ।
सांसदया शपथ ग्रहण हे मयानीवं सर्वोच्चं मनाङेयात बियातःगु सजाय सदार यानाबीवं आः वयागु सांसद पद नं वनीगु जूगु दुसा फौजदारी मुद्दा जूगुलिं लिपा नं गुबलें उम्मेदवार जुइ मदयेकाबिउगु दु ।
२०६९ सालय् मेम्ह डन मिलन चक्रेयात तरवारं पाःगु मुद्दाय् मनाङेयात जेल सजाय बियातःगु खः । उबलय् जूगु घटनाय् प्रहरीं मनाङेया लिसें थौंकन्हय्या मेम्ह डन गणेश लामा, रेवत कार्की, रमेश सुनुवार व उमेश लामा विरुद्ध ज्यानमारा मुद्दा दर्ता याःगु खः । जिल्ला अदालतं ल्वापुया मुद्दाय् निदँया जक सजाय न्यंकूगु खःसा सरकारं वकिलं याःगु पुनरावेदनय् मनाङेयात न्यादँ सजाय बियाः मेपिंत सफाइ बिउगु खः ।
आः थ्व हे मुद्दाय् थौं सर्वोच्चया न्यायाधीश दीपकराज जोशी व पुरुषोत्तम भण्डारीया मंकाः इजलासं सदर यानाबिउगु खः । जिल्ला अदालतं निदँया निंतिं बिउगु सजाय मनाङें भुक्तान यायेधुंकूसां आः ल्यं दनिगु स्वदँया सजाय धाःसा फयेमालीगु खँ धाःगु दु ।