
न्हूदिल्ली (रासस)÷ प्रधानमन्त्री पुष्पकमल दाहालया भारत भ्रमणया झ्वलय् भारतया बथनाहां निसें नेपाःया विराटनगरया बुधनगर तक कार्गो रेल संचालनय् वःगु दु । अथेहे पेट्रोलियम पदार्थ ढुवानीया निंतिं निगू पाइपलाइन दयेकेगु सहमति जूगु दु । अथेहे निम्हं प्रधानमन्त्रीं नेपाल व भारत दथुइ मतया व्यापारया निंतिं ‘न्यू बुटवल–गोरखपुर अन्तरदेशीय प्रसारण लाइन’या शिलान्यास याःगु दु ।
प्रधानमन्त्री व भारतीय समकक्षी नरेन्द्र मोदीं बिहिवाः रेल्वे सेवाया मंकाः उलेज्या यासें कार्गो रेल संचालनय् हःगु खः । न्हूदिल्लीइ च्वंगु प्रधानमन्त्री मोदीया ज्याकू हैदरावाद हाउसं निगुलिं देय्या प्रधानमन्त्रीतय्सं वाउँगु झण्डा ब्वयेकेवं बथनाहां कार्गो रेल बिदाइ याःगु खः । थ्व रेलयात बुधनगरय् नेपाली पक्षं लसकुस याइ ।
विराटनगरया एकीकृत भन्सार जाँच चौकीतक वइगु थ्व कार्गे रेलय् छुं उद्योगया निंतिं कच्चापदार्थ तयाहःगु दु । ताःई न्ह्यवनिसें व्यवसायीतय्सं बथनाहा निसें बिराटनगरया एकीकृत जाँच चौकी तक वइगु रेलपाखें मालसामान ढुवानी यायेगु निंतिं सहजीकरण यायेत इनाप याना वयाच्वंगु खः ।
भारतया बथनाहां विराटनगरया आइसिपी रेल्वे स्टेशनतकया च्यागू किलोमिटरया रेलमार्ग तयारी अवस्थाय् दु । थ्व रेलमार्ग २०७५ कार्तिक ८ गते हे संचालनया निंतिं परीक्षण नं जुइधुंकूगु खः । आः उलेज्या जुइधुंकाः थ्व रेलमार्ग नियमित संचालनय् वइगु खँ धाःगु दु । अथेहे यात्रुवाहक रेल नं संचालन यायेगु तयारी जुयाच्वंगु दु ।
बथनाहा निसें विराटनगर जुयाः कटहरी तक वइगु १८.१ किलोमिटरया रेलमार्ग दयेकेगु ज्या २०११ निसें न्ह्याःगु खःसां आःतक पूवंगु धाःसा मदुनि । छुं थासय् मुआब्जाया विवाद दुगु व थ्व समस्या याकनं समाधान यायेगु खँ धाःगु दु । भारत सरकारया आर्थिक व प्राविधिक ग्वाहालिं थ्व रेलमार्ग दयेकूगु खः । थ्व रेलमार्ग भारतपाखे न्यागू व नेपाःपाखे १३ किलोमिटर दु ।
तत्कालिन राष्ट्रपति डा. रामवरण यादव भारत भ्रमणय् वंगु इलय् भारतं नेपाःया खुगू थासय् रेलमार्ग दयेकाबीगु सम्झौता जूगु खः ।
पेट्रोल पाइपलाइनय् सहमति
प्रधानमन्त्री दाहालाय भारत भ्रमणया झ्वलय् पेट्रोलियम पदार्थ ढुवानीया निंतिं निगू पाइपलाइन दयेकेगु सहमति जूगु दु । थ्व पाइललाइन दयेकेत भारतं थ्यंमथ्यं १७ अर्ब तका बराबरया ग्वाहालि बीगु जूगु दु । थ्व परियोजना अन्तर्गत निगू पाइपलाइन व छगू भण्डारणस्थल दयेकीगु जुइ । भण्डारणस्थल धाःसा नेपालं थःगु हे खर्चं दयेकीगु जुइ ।
सहमति कथं भारतया सिलगुडी निसें झापा तक व बाराया अमलेखगञ्ज निसें चितवनया लोथर तक पाइपलाइन दयेकीगु जुइ । भण्डारणस्थल धाःसा झापाय् दयेकीगु जुइ ।
नेपाल आयल निगम व इण्डियन आयल कर्पोरेशन दथुइ ताःई न्हयवनिसें पाइपलाइन दयेकेगु बारे सहलह जुयाच्वंगु खःसां सहमति धाःसा जुइ मफयाच्वंगु खः । प्रधानमन्त्री दाहालया भारत भ्रमणया झ्वलय् थ्व परियोजना सरकारीस्तरं हे न्ह्यःने न्ह्याकेगु सहमति जूगु खः । थ्व निगुलिं पाइपलाइनया निंतिं अध्ययन जुइधुंकूगुलिं सम्झौता लिपा आयोजना दयेकेगु ज्या न्ह्याइगु विश्वास यानातःगु दु ।
अन्तरदेशीय प्रसारण लाइनया शिलान्यास
भारत भ्रमणय् दुम्ह प्रधानमन्त्री दाहाल व भारतीय प्रधानमन्त्री मोदीं हैदरावाद हाउसं हे न्यू बुटवल गोरखपुर अन्तरदेशीय प्रसारण लाइनया शिलान्यास याःगु दु । थ्व प्रसारण लाइन निगू देय् दथुइ मतया व्यापार यायेत महत्वपूर्ण तायेकातःगु परियोजना खः । थ्व प्रसारण लाइन उच्च क्षमताया निगूगु अन्तरदेशीय प्रसारण लाइन खः । थ्व आयोजना दयेकेगु निंतिं बिस्कं हे कम्पनी नं स्थापना यायेधुंकूगु दु । थ्व कम्पनीइ नेपाल विद्युत प्राधिकरण व भारतीय विद्युत प्राधिकरणया समान लगानी दु ।
नवलपरासीया सुनवल नगरपालिका १३ य् लाःगु न्यू बुटवल सवस्टेशनं सुरु जुयाः भारतया गोरखपुर सवस्टेशन तक थ्यनीगु ४०० केभी डबल सर्किट प्रसारण लाइनया लम्बाइ १२० किलोमिटरया जुइ । थुकी २० किलोमिटर नेपाःपाखे लाइसा १०० किलोमिटर भारतय्पाखे लाइ । प्राधिकरणया कार्यकारी निर्देशक कुलमान घिसिङं शिलान्यास लिपा थ्व आयोजना दयेकेगु ज्या न्ह्याःवनीगु विश्वास प्वंकादीगु दु ।
थ्यंमथ्यं न्हय्गू अर्ब ३९ करोड लगानी जुइगु थ्व आयोजनाया वित्तीय व्यवस्थापन ८० प्रतिशत त्यासापाखें व २० प्रतिशत इक्विटीपाखें जुइ । कार्यकारी निर्देशक घिसिङया कथं थ्व प्रसारण लाइन स्वदँया दुने दयेके क्वचायेकेगु कथं ज्याः न्ह्याःवनेधुंकूगु दु ।
LEAVE YOUR COMMENTS