ने. सं. ११४३ तछलाथ्व दशमी -

मिसां मेम्ह इहिपा याःसा अंश लित बीमाःगु कानून, अंश लित बीत मिस्तय् विरोध

येँ- भाःतयाके अंश कयाः पारपाचुका वंम्ह मिसां यदि हानं इहिपा यात धाःसा न्हापायाम्ह भाःतयात थम्हं कयागु अंश लित बीमाः धकाः कानूनय् जुइत्यंगु संशोधनयात कयाः समाजय् तःधंगु विवाद ब्वलंगु दु । पारपाचूम्ह मिसां यदि यदि पुनर्विवाह यात धाःसा न्हापा कयातःगु अंश लित बीमाः धइगु प्रावधान तयाः कानून संशोधन यायेत्यंगु समाचार पिहां वयेवं मिसा अधिकारवादीतय्सं उकिया कडा विरोध याना हःगु दुसा अज्याःगु अवस्थाय् मिसां अंश पित बीमाः लाकि म्वाः धइगु खँय् तःधंगु वहस नं शुरु जूगु दु ।
सर

कारं यायेत्यंगु थ्व कानुन संशोधनं मिसायात पुनर्विवाह याके मबीगु व न्ह्याबलें नं मिजंया दास जुयाः हे च्वनेमाः धइगु वातावरण दयेकेत्यंगु द्वपं मिसा अधिकारवादीतय्सं बियाहःगु दु ।

आः सरकारं यायेत्यंगु कानुन संशोधन कथं पुलांम्ह भाःतपाखें अंश कया वंम्ह मिसां हानं मेम्ह मिजंलिसे इहिपा यात धाःसा वं काःगु अंश पुलांम्ह भाःतपाखें दुम्ह काय वा म्ह्याय्, वा भाःतम्ह वा भाःत मदयेधुंकूसा वया थःथितियात लित बीमाः धइगु व्यवस्था यानातःगु दु ।

मिसा अधिकारवादीतय्सं धाःसा संसारय् गनं नं निक्वःगु इहिपा याइम्ह मिसां न्हापा कयातःगु अंश पुलांम्ह भाःतयात लित बीगु व्यवस्था मदुगु जुयाः नेपालय् नं थज्याःगु व्यवस्था यायेगु पाय्छि मखु धकाः सः तयाहःगु दु । अथे हे मिसां छम्ह मिजंलिसे च्वनाः वयागु छेँज्या यायेगु, वयागु लागिं मचा बुइकेगु व मचा ब्वलंकेगु तकया गुगु ज्या याःगु खः, उकिया हे ज्यालाया रुपय् अंश काःगु जूगुलिं मेथाय् इहिपा यायेवं थ्व लित बीमाः धायेगु पाय्छि मजूगु खँ धाःगु दु ।

थ्व प्रावधानं यानाः मिसापिनिगु पुनर्विवाहयात हानं संकटय् लाका बिउगु व मिस्तय्सं पुनर्विवाह धइगु हे याये दइ मखु धइगु अवस्था सिर्जना याःगु द्वपं नं बियाहःगु दु । सामाजिक सञ्जालय् थुकियात पाय्छि खः व पाय्छि मखु धाइपिनिगु वहस जुयाच्वंगु दु ।

अंश लित बीमाःगु कारण
वर्तमान अवस्थाय् गुलिखे मिस्तय्सं भाःतयाके पारपाचुकाः अंश कायेगु व वयां लिपा मेम्ह मिजंलिसे इहिपा यानाः वलिसे नं अंश कयाः पारपाचुकेगु थेंज्याःगु ‘पेशेवर’ ज्या याना हःगु जूगुलिं अज्याःगु प्रवृत्तियात नियन्त्रण यायेगु लागिं कानुनय् थज्याःगु संशोधन यायेमाःगु खँ सरकारं धयाहःगु दु । भाःतं पारचुकेवं थःगु बछि अंश कलाःयात बिया छ्वये मालीबलय् वयापाखें दुपिं मस्तय्त अंशया भाग कम जू वनीगु अवस्था सिर्जना जूगु कारणं नं मिसां यदि मेम्ह मिजं इहिपा यात धाःसा वयात माःगु अंशं न्हूगु थासं हे प्राप्त जुइगु कानुनी व्यवस्था दुगुलिं पुलांम्ह भाःतपाखें काःगु अंश वया हे मस्त (गुम्ह कि व थम्हं हे बुइकूगु खः) यात लित बीगु व्यवस्था यानागु खँ नं सरकारं धाःगु दु ।