येँ महानगर व नियमनकारी निकाय दथुइ बजाः अनुगमनय् सहकार्य

येँ- येँ महा नगरपालिकां सम्बन्धित निकायलिसे जानाः बजाः अनुगमन याइगु जूगु दु । येँ महानगपालिकां येँमहानगरया बजाः अनुगमन याइगु इलय वाणिज्य विभाग व सम्बन्धित पालिकालिसे सहकार्यव समन्वय यायेगु खँ धाःगु दु । येँ महानगरया बजाः व्यवस्थापन प उपभोक्ता हित संरक्षण समितिं बजाः अनुगमन याइगु इलय् आवंलि उकथं विभाग व सम्बन्धित पालिकालिसे सहकार्य, समन्वय यायेगु धाःगु खः ।

समितिया संयोजकलिसें महानगर उपप्रमुख हरिप्रभा खड्गी श्रेष्ठया अध्यक्षताय् च्वंगु बैठकं उकथंया निर्णय याःगु खः । थुकथं विभाग व सम्बन्धित पालिकालिसे समन्वय यानाः उत्पादन क्षेत्रतक वनेगु निर्णय नं बैठकं याःगु दुसा बजाः अनुगमनया झ्वलय् जुइगु जरिवाना महानगरया राजस्व खाताय् दाखिला यायेगु नं बैठकं निर्णय याःगु दु ।

थगुने माघ ७ गते च्वंगु येँ महानगरया च्याक्वःगु नगरसभाया निगूगु बैठकं ‘येँ महानगरपालिका बजाः व्यवस्थापन तथा अनुगमन विधेयक–२०७७’ पारित यासे महानगरपाखें जुइगु बजाः अनुगमनया झ्वलय् याइगु दण्ड जरिवाना तप्यंक महानगरया खाताय् जम्मा यायेगु व्यवस्था याःगु खः ।

उगु ऐन स्थानीय वस्तु व सेवा बजाःया व्यवस्थापन यायेगु स्थानीय सरकारया जिम्मेवारी जूगु ल्याखं जारी याःगु खः । स्वच्छ बजाःपाखें गुणस्तरीय वस्तु व सेवा प्राप्त यायेगु उपभोक्ताया मौलिक हक लिसेसम्बन्धित जू। बजाः व्यवस्थापन, उपभोक्ता अधिकार व बजाःलिसे सम्बद्ध पक्षया दायित्व थेंज्याःगु विषययात प्रबन्ध यानातःगु ऐनय् १२ गू परिच्छेद व ४१ गू दफा दुथ्यानाच्वंगु दु।

बजाः व्यवस्थापन व उपभोक्ता हित संरक्षण समिति महानगर उपप्रमुखया संयोजकत्वय् गठन यायेगु व्यवस्था यानातःगु दुसा महानगरया उपभोक्ता हित संरक्षण स्वइम्ह अधिकारीया संयोजकत्वय् बजाः अनुगमन टोली गठन यायेगु व्यवस्था यानातःगु दु । थुगु पुचलं बजाः अनुगमनया इलय् मूल्यसूची स्वयेगु, निरीक्षण अधिकारीया व्यवस्था यायेगु, निरीक्षण अधिकारीया काम, कर्तव्य व अधिकार, कसुर व सजाय सम्बन्धी व्यवस्था उजुरी व छानविन सम्बन्धी व्यवस्था याये फइगुख ँ दुथ्याकातःगु दु ।

बैठकय् समितिया संयोजक लिसें महानगर उपप्रमुख खड्गी श्रेष्ठं बजाः अनुगमनप्रति उत्पादन क्षेत्र, व्यापार क्षेत्र व उपभोक्ता हितलिसें उपभोक्ताया विश्वास दइकथंज्या यायेमाःगु खँ धयादीगु दु ।

‘नां जकया अनुगमन यायेगु मखसे बजाःया स्वच्छता, व्यापार व उपभोक्ताया निगुलिं पक्षया लाभ जुइकथं ज्या यायेमाःगु वय्कःया धापू दु ।
बैठकय् तरकारि, सिसाबुसा, लः, ला, न्या, दुरु व दुरुजन्य पदार्थ दयेकातःगु नसाज्वलंया तौल व गुणस्तरया अनुगमनया इलय् ध्यान बीमाःगु थीथी पक्षयात कयाः सहलह जूगु खः ।