प्रा. माणिकलालया लुमन्तिइ सफू

ख्वप-  राजनीतिक विश्लेषकलिसें वरिष्ठ समालोचक प्रा. माणिकलाल श्रेष्ठया दकिलाया पुण्य तिथिइ वय्कःया लुमन्तिइ सफू पिथंगु दु । स्रष्टा समाज नेपालया ग्वसालय् थन जूगु छगू ज्याझ्वःया दथुइ वय्कःया दकिलाया पुण्य तिथिइ लाकाः ‘प्रा. माणिकलाल श्रेष्ठको स्मृतिमा’ नांया सफू पिथंगु खः ।

सफूया पितब्वज्या यासें नेपाल मजदुर किसान पार्टीया अध्यक्ष नारायणमान बिजुक्छेँ रोहितं प्रा. माणिकलाल श्रेष्ठ छम्ह प्राध्यापक, वामपन्थी विश्लेषक, मृदृभाषी,कम्युनिष्ट विचारक व अन्तर्राष्ट्रियवादी जक मखसे छम्ह सच्चा राजनीति चिन्तक नेता, विचारक, च्वमि, स्पष्ट वक्ता नं खः धयादिल ।

थीथी देय्या बारे जानकार अन्तर्राष्ट्रिय ज्ञातालिसें प्रतिष्ठित नेपाली विद्वान नं खः धासें प्रा. माणिकलाल चीन व कोरियाया ज्ञाता जक मखु, तिब्बत चीनया हे अभिन्न अंग खः धइगु धारणा तयादीम्ह व्यक्तित्व नं खः धयादिल ।

मदुम्ह प्रा. माणिकलालया कायः डा. मलखलाल श्रेष्ठं नेपाल मजदुर किसान पार्टी व थः अबुया विचाः यक्व ज्वःलाःगु खँ न्ह्यथनादिल । मेम्ह काय डा. सितुलाल श्रेष्ठं ख्वपय् मेडिकल कलेज चायेकल धाःसा थःपिंसं ग्वाहालि यायेगु बचं बियादिल ।

समाजया नायः लक्ष्मीराज जोशीया सभापतित्वय् जूगु ज्याझ्वलय् वय्कःया म्ह्याय्चा रमिला श्रेष्ठ, समाजया दुजःपिं रजनी जोशी व सुशिला कर्माचार्यं नं थःथःगु नुगःखँ तयादगिु खः।

पितब्वज्या जूगु सफू प्रा. माणिकलाल श्रेष्ठं हे च्वयादीगु राष्ट्रिय अन्तर्राष्ट्रिय विषयया महत्वपूर्ण च्वसुत दुथ्यानाच्वंगु दु ।

सम्बन्धित बुखँ

LEAVE YOUR COMMENTS