लेबनानय् नेपालीत सुरक्षित थासय्

येँ (नेपालभाषा टाइम्स)- लेबनान स्वइगु इजिप्टस्थित नेपाली दूतावासं लेबनानय् च्वनाच्वंपिं नेपालीतय्त सतर्क जुयाच्वनेत इनाप याःगु दु । इजरायलं लेबनानय् आक्रमण यानाः हिज्बुल्लाह नेतायात स्यायेवं निगू देय् दथुइ लडाइँ जुइफुगु कारणं दूतावासं सचेत जुइत धाःगु खः । दूतावासं लेबनानय् च्वनाच्वंपिं नेपालीतय् तथ्यांक संकलन यायेगु नं सुरु याःगु खँ धाःगु दु ।

लेबनानय् थौंकन्हय् न्यासःम्हं मल्याक नेपालीत थ्यनाच्वंगु खँ धाःगु दु । तर थुपिं आःया अवस्थाय् सुरक्षित हे दुगु खँ धाःगु दु । इजरायलं आक्रमण याइगु थाय् लेबनानया मुस्मांत अप्वः च्वनीगु लागा खः । तर नेपालीत ज्या यानाच्वंगु थाय् फुक्क क्रिस्चियनत च्वनीगु जूगुलिं सुरक्षित जूगु खँ अन ज्या यानाच्वंपिं नेपालीतय्सं धाःगु दु ।

गैरआवासीय नेपाली संघ लेबनानया पुलांम्ह अध्यक्ष अशोक थापाया कथं नेपालीत च्वनाच्वंगु बेरुत क्षेत्रया अवस्था सामान्य हे दु । इजरायलं आक्रमण याइगु थासय् थ्यंकेत थनं निघौ बसय् च्वना च्वनेमाः ।