जब थःगु हे छेँ थम्हं छ्यलेत समस्या जुल

येँ (नेपालभाषा टाइम्स) – वंगु निवाः न्ह्यः टेकुया छखा छेँय् न्याम्ह दुजःतय्त कोरोना संक्रमण जुल । छक्वलं न्याम्हेसित पोजिटिभ वयेवं छेँजःपिं आँटे चाल । तर संक्रमण जूपिं न्याम्हेसितं भर्ना यायेगु लागिं गनं हे अस्पतालय् बेड खाली मदु। छु याये छु याये जूपिं छेँजःपिं थःगु छेँय् वंगु गुला न्ह्यवंनिसें तयातःगु छगू अफिस चायेकाः अन हे आइसोलेशनय् तये माली धकाः वडा ज्याकुथी वन । तर वडा ज्याकू नं कर्मचारीतय्त कोरोना जूगुलिं सेवा बन्द धकाः सुचं तिकाः बन्द याना तल ।

कोरोना विरामीतय्त आइसोलेशनय् तयेगु लागिं थःपिनि छेँय् तयातःगु उगु अफिसया क्वथा थःपिंसं हे चायेकल । क्वथा चायेकाः उकिया फुक्क भिडियो दयेकल । वयां लिपा संक्रमण पुष्टि जूपिंत अन हे आइसोलेशन तयेगु व्यवस्था जुल । आइसोलेशनय् च्वंपिं लिपा बुलुहुँ लना वनेगु नं शुरु जुल ।

लिपा वडा अफिस नं चाल । वडा अफिस चायेवं छेँजःपिंसं वडाय् वनाः उकिया मुचुल्का उठे यायेत इनाप यात । तर वडाध्यक्षं थःपिंत जानकारी तकं मबिसें ज्या याःगु धासें तत्काल ग्वाहालि याये मफइगु खँ धाल । वडा ज्याकुथी धाःकथं अज्याःगु ज्या कामपाया न्यायिक निकायय् छ्वयाः जक यायेमाः । न्यायिक निकायं सुइन्यान्हुया म्याद बी । वयां लिपा जक वडाया प्रतिनिधि व प्रहरी प्रतिनिधि च्वनाः ताःफ्वः तछ्यायेगु ज्या याइ ।

छेँथुवाःतय्सं थःपिनि कोरोना ल्वगितय्त अस्पतालय् बेड मदु धाःगुलिं थःगु हे छेँय् आइसोलेशनय् तयेत बन्द अफिस क्वथा चायेकूगु खः । लकडाउनं यानाः बन्द जूगु उगु अफिसया थुवाः नं सम्पर्कय् मदु। आः अफिसथुवाः लिहां वल धाःसा थ्व समस्या झन् तःधं जुया वनीगु खः लाकि धइगु चिउताः छेँथुवाःतय्त जुयाच्वंगु दु ।

कोरोना भाइरस संक्रमणया कारणं राजधानी येँदेय्या स्थानीय जनतां फये मालाच्वंगु अनेक कथंया न्हून्हूगु समस्यात मध्ये छगू थ्व नं खः । छेँ थःगु हे खयाः नं न बालं च्वंपिंपाखें बाः वः, न संकटया इलय् थःगु हे छेँ प्रयोग यायेगु अवस्था दु ।