
येँ- ११२ क्वःगु अन्तर्राष्ट्रिय मिसा दिवसया लसताय् न्हापांगु पलाः नेवाः मिसा पुचःया ग्वसालय् जेष्ठ मिस्तय्त हनेज्या जुल । येँ महानगरपालिकाया उपमेयर हरिप्रभा खड्गी श्रेष्ठं वय्कःपिंत हनाः थीथी कथंया समाग्री नं लःल्हानादीगु खः । ज्याझ्वलय् समाजसेवी यज्ञरत्न धाख्वां मृत्य खनाः ग्यापिं मनूत न्हिन्हिं सिनाच्वने मालीगु खँ कनादिसें झीगु जीवन लः थें बाः वनाच्वनीगु जूगुलिं जीवन दुबलय् हे छुं यायेमाः धयादिल । वय्कलं दुःख मदुपिं सुं दइमखु, कन्हय् धइगु गबलें वइमखु धयादिसें थःगु जीवन सुथां लानाच्वंगु इलय् हे समाजया लागिं छुं यानाः क्यनेमाः धयादिल ।
नेपाल व चीन लागा निगुलिं थासं सगरमाथाया सफल आरोहण यानाः विश्व कीर्तिमान तयेत ताःलाःम्ह व्यक्तित्व कल्पना महर्जनं थःगु पारिवारिक जिम्मेवारी नापनापं समाजं म्हसीकेगु निंतिं थःम्हेसिनं कठीन स्वयां कठीन परिस्थितिइ नं श्रम व मेहनतयात मू मन्त्र यानाः ज्या याना वनेमाःगु खँय् बः बियादिल । उगु ज्याझ्वलय् सभासद् राज्यलक्ष्मी श्रेष्ठं थीथी सामग्री लःल्हानादिसें मां बाया सेवा थेंज्याःगु तःधंगु ज्या मेगु छुं नं मदु तयादिल ।
न्हापांगु पलाः नेवाः मिसा पुचःया नायः शिला साय्मिया सभापतित्वय् जूगु ज्याझ्वलय् न्हापांम्ह सगरमाथा आरोही मिसा पत्रकार कल्पना महर्जन, सुनिता डंगोल, १०५ दँया बुद्धिमाया मजर्हन व बेटी महर्जनपिंत विशेष सम्मान याःगु खःसा जंक्वः सिधयेधुंकूपिं स्वीन्याम्ह स्वयां अप्वःसित येँ महानगरपालिका २० वडाया अध्यक्ष राजेन्द्र मानन्धरलगायतं हनेज्या यानादीगु खः ।
LEAVE YOUR COMMENTS