स्वम्ह मिसा च्वमिया प्यंगू सफू पितब्वज्या
यल(नेपालभाषा टाइम्स)÷ नेपालभाषा फाउण्डेसनया ग्वसालय् जूगु छगू ज्याझ्वलय् छगू हे परिवारया स्वम्ह मिसा च्वमिया प्यंगू सफूया पितब्वज्या जुल । थनया याक प्यालेसय् जूगु ज्याझ्वलय् मां व वय्कःया निम्ह म्ह्याय्पिनिगु सफूया पितब्वज्या याःगु खः ।
ज्याझ्वलय् मोतिशोभा श्रेष्ठया ‘प्रकृति’, ‘लुमन्तिया डायरी’, ‘ख्वबि’ व ‘सत्य व मां’ उपन्यास सफू व ‘नेपालय् घरेलु उद्योगया विकास’ नांया निगू सफू, वय्कःया तःधिकम्ह म्ह्याय् डा. सृजना श्रेष्ठया ‘न्ह्यसःचिं निसें लिसः चिं तक’ व ‘सुपाँय् नं छु स्यू’ व चिधिकःम्ह म्ह्याय् डा. सबिना श्रेष्ठया ‘जिन्दगी ः छगू न्ह्यसः चिं व मनया स्पर्श’ नांया सफू पितब्वज्या याःगु खः ।
पितब्वज्या जूगु सफूमध्ये मोतिशोभाया छगू हे सफुतिइ प्यंगू उपन्यास दुथ्यानाच्वंगु दुसा मेगु वय्कः छम्ह अर्थशास्त्री जूगु ल्याखं वय्कलं तःदँ तक सरकारी सेवाय् तःदँ तक फ्यानादीगु अनुभवयात कयाः च्वयातःगु सफू खः ।
नेपालभाषा एकेदेमिया चान्सलर यज्ञरत्न धाख्वाया प्रमुख आतिथ्यताय् जूगु ज्याझ्वलय् फाउण्डेसनया नायः मंगलमान शाक्यं संस्थां याना वयाच्वंगु ज्याझ्वः व गतिविधिया बारे जानकारी बियादीगु खः ।
पितब्वज्या जूगु सफूयात कयाः साहित्यकार शाक्य सुरेनं पितब्वज्या जूगु प्यंगुलिं सफूया समीक्षा यानादीगु खःसा च्वमि डा. रिना तुलाधरं नं सफू व च्वमिया बारे नुगःखँ तयादीगु खः ।
मूपाहां धाःख्वा, नेपाल सरकारया पुलांम्ह सचिवलिसें साहित्यकार शंकरप्रसाद कोइरालां भिंतुना न्वचु बियादीगु ज्याझ्वलय् स्वम्हं च्वमिं साहित्य सिर्जनाय् थःथःगु अनुभव कनादीगु खः । च्वमि श्रेष्ठ तःकेहें नं चिनाखँ ब्वनाः न्यंकादीगु खः ।
LEAVE YOUR COMMENTS