एमसीसीं राजनीतिक भद्रगोल

येँ- संसदय् टेबल जुयाच्वंगु एमसीसी परियोजना बारे म्हिगः सहलह मजुल । उकिया बारे संसदय् सहलहया तयारी जूगु खःसां एमसीसी बारे सहमति मजूगु कारणं म्हिगःया संसद बैठक थौं सारे याःगु दु ।

संसद बैठक स्थगित जुइवं एमाले अध्यक्ष केपी शर्मा ओली व प्रधानमन्त्री शेरबहादुर देउवा दथुइ खँल्हाबल्हा जूगु खः । खँल्हाबल्हाय् प्रम देउवां एमसीसी पास यायेत अध्यक्ष ओलीयात इनाप यानादीगु खःसा अध्यक्ष ओलीं थप ई फ्वनादीगु खः ।
सहलहय् प्रम देउवां एमसीसी सम्झौता एमालें हे याःगु व उकियात थःपिंसं न्ह्यःने जक न्ह्याकागु खः धासें थ्व आः देय्या हे प्रतिष्ठाया विषय जुइधुंकूगुलिं थुकियात पास यायेनु धकाः प्रस्ताव यानादीगु खः । ओलीं पार्टीइ सहलह यानाः जक थुकी लिसः बी धयादीगु खँ सूत्रं कंगु दु ।

मेखे सरकारया प्रवक्ता लिसें सञ्चारमन्त्री ज्ञानेन्द्रबहादुर कार्कीं आः फुक्कं दलया सहमति कयाः संसद न्ह्याकेगु खँ धयादीगु दु । वय्कलं प्रम देउवा व एमाले अध्यक्ष ओली दथुइ संसद सञ्चालन यायेगु बारे सहलह जूगु जानकारी नं बियादिल ।

मन्त्री कार्कीं एमसीसी बारे गहन सहलह यायेत नं संसद न्ह्याकेमाःगु दु धासें ‘संसदय् गुलि नं राजनीतिक दल दु उपिं फुकसिया सहमतिइ संसद सुचारु जुइ, एमसीसी पास यायेमाःगु ईया झी सकस्यां सिउ, उगु ईया दुने निकास पिहां वइ’ धयादीगु दु ।

अथे हे म्हिगः प्रम देउवा व माओवादी अध्यक्ष पुष्पकमल दाहाल दथुइ नं सहलह जूगु खः । उकी दाहालं एमसीसीया संसदीय प्रक्रिया तत्कालया निंतिं पनेत इनाप यानादीगु खःसा देउवां उकियात अस्वीकार यानादीगु खः ।

दाहालयात प्रम देउवां एमसीसी अनुमोदन प्रक्रिया दीमखु धासें भोट तयेगु खःसा तयादिसँ मखुसा प्रक्रिया दिकेगु ज्या जुइ मखु धकाः लिसः बियादीगु खँ नं सीदुगु दु ।

देउवा नापलाये न्ह्यः अध्यक्ष दाहालं नेकपा एसया अध्यक्ष माधव नेपाल व वरिष्ठ नेता झलनाथ खनाल–लिसे नं खँल्हाबल्हा यानादीगु खः ।

एमसीसी प्रदर्शनय् यक्व घाःपाः, छम्ह सिकिस्त
येँ -एमसीसी विरुद्ध जूगु प्रदर्शनया झ्वलय् म्हिगः वानेश्वरय् प्रदर्शनकारी व प्रहरी दथुइ ल्वापु जुल । प्रदर्शनकारीत ब्यारिकेड चीकाः न्ह्यःने वनेवं प्रहरीं टियर ग्यास कयेकाः भीड तितर बितर याःगु खः ।

सत्तारुढ दल माओवादीया भातृ संगठन वाईसील लगायत थीथी दलया कार्यकर्तातय्सं म्हिगः उगु प्रदर्शन याःगु खः । उकी राप्रपा नेपालया कार्यकर्तातय्सं ब्वति काःगु खः ।

प्रदर्शनकारीतय्सं प्रहरीयात अप्पां कयेकूगु खःसा प्रहरीं आपालं टियर ग्याँस कयेकूगु खः । प्रहरीं कयेकूगु टियर ग्याँसया शेलं छ्यनय् कयाः हेमराज अवस्थी नांया प्रदर्शनकारी सिकिस्त जुइक घाःपाः जूगु दु । प्रदर्शनय् मेपिं १२ म्ह घाःपाः जूगु दु ।

संसद भवन पिने प्रदर्शन जुइवं ट्राफिकं येँया फिब्व ख्यः व मेखे कोटेश्वरंनिसें हे लँ पनाः यातायात साधनयात निषेध याःगु खः । थुकिया पलेसा ट्राफिकं आपालं वैकल्पिक लँ छ्यलेगु ज्या याःगु खः ।

थ्वहे झ्वलय् नेकपा (एस)या वरिष्ठ नेता खलनाथ खनालं एमसीसी पास यायेगु कुतः यात धाःसा थःपिं नं आन्दोलनय् कुहां वयेगु ख्याच्वः बियादीगु दु । म्हिगः संसद भवन पिने पत्रकारतलिसे खँ ल्हासें वय्कलं धयादिल, ‘एमसीसी पास यात धाःसा सतक क्वाइ, क्वाइ जक मखु च्याइ ।’