एनएफपीजें संचार राज्यमन्त्रीयात ज्ञापन पौ लःल्हात

येँ – संचार, सूचना व प्रविधि राज्यमन्त्री गोकुलप्रसाद बाँस्कोटां राज्यं फोटो पत्रकारितायात नं थःगु प्राथमिकताय् तयेगु धयादीगु दु । राष्ट्रिय फोटो पत्रकार समूह (एनएफपीजें) लःल्हाःगु ज्ञापन पौ लःल्हाना कासें राज्यमन्त्री बाँस्कोटां उगु खँ धयादीगु खः । वय्कलं थ्व स्वयां न्ह्यः राज्यं फोटो पत्रकारितायात कःघाये मफुगु व आः फोटो पत्रकारितायात प्राथमिकताय् तयेगु जुइ धासें फोटो पत्रकारं नेपालय् पत्रकारिता क्षेत्रय् म्हितूगु भूमिकायात च्वछासें फोटो पत्रकारया रचनात्मक ज्याया निंतिं ग्वाहालि यायेगु प्रतिवद्धता नं प्वंकादिल ।

राज्यमन्त्री बाँस्कोटायात एनएफपीजेया सचिव प्रदीपराज वन्तं न्हय्गू बुँदाया ज्ञापन पौ लःल्हानादीगु खः । ज्ञापन पती फोटो पत्रकारतय् जीविकोपार्जनया निंतिं न्यूनतम पारिश्रमिक राज्यं हे क्वःछीमाःगु, फोटोपत्रकारतय्सं जोखिम नालाः कार्य सम्पादन यायेमाःगु लिं जीवन बीमालिसें संचार सामग्री (क्यामरा)या नं बीमाया व्यवस्था यायेमाःगु, नेपाल सरकारया राजकीय व मेमेगु उच्चस्तरीय विदेश भ्रमण जुइगु इलय् फोटो पत्रकारतय्त नं दुथ्याकेमाःगु, समाचार च्वइपिं पत्रकार सरह फोटो पत्रकारतय्त नं समान अवसर प्राप्त जुइगु वातावरण दयेमाःगु माग यानातःगु दु ।

अथे हे फोटो पत्रकारतय् हकहितया निंतिं न्यय्गू लाखया अक्षय कोष नीस्वनेमाःगु, राष्ट्रिय फोटो पत्रकारिता पुरस्काया निंतिं म्होतिं नं २० गू लाख तका बराबरया अनुदान राज्यं दँय्दसं फ्यायेमाःगु नं माग याःगु दु । थ्व हे झ्वलय् एनएफपीजें वइगु बैशाख १३ गते हनेत्यंगु फोटो पत्रकारिता दिवसया बारे नं जानकारी याकूगु खः ।