महानगरं झिम्ह स्रष्टातय्त हन

येँ (नेपालभाषा टाइम्स)- येँ महानगरपालिकाया स्वीक्वःगु वार्षिकोत्सवया लसताय् वरिष्ठ साहित्यकार, नेवाः न्ह्यल’वाः मल्ल के सुन्दर लिसें १० म्ह स्रष्टातय्त म्हतिं छगूत्या लाख दां सहित हनेज्या याःगु दु ।

येँमपापाखें तिंख्यःया सैनिक मञ्चय् शुक्रवाः ग्वसाः ग्वःगु ज्याझ्वलय् उपराष्ट्रपति रामसहायप्रसाद यादव, महानगर प्रमुख बालेन्द्र शाह, उपप्रमुख सुनीता डङ्गोलपिंसं स्रस्तापिंत हनेज्या याःगु खः ।

महानगरं थुगुसी लोकम्येयाख्यःपाखे कुमार बस्नेत, चित्रकलापाखे किरण मानन्धर, स्वास्थ्यपाखे डा. अरुण साय्मि, राजनीति व समाजसेवापाखें येँमपाया पुलांम्ह मेय्र पिएल सिंह, कलाकारितअन्तर्गत संकिपापाखे नरेन्द्र कंसाकार, साहित्यपाखे मल्ल के सुन्दरयात हंगु खः ।

अथेहे कासापाखे तेक्वान्दोया सङ्गिना वैद्य, भलिबलया प्रतिभा माली व क्रिकेटया ज्ञानेन्द्र मल्ल हंगु खः । हंपिं व्यक्तित्वपिंत म्हतिं छगू लाख न्यय्द्वः तका दां नं लःल्हाःगु खः । अथेहे ज्याझ्वलय् येँ महानगर दुनेया परम्परागत त्वाःया बाजं गुरुपिंत नं दां लिसें सम्मान याःगु खः ।

ज्याझ्वलय् येँमपाया ३२ गुलिं वडापाखें थःथःगु सांस्कृतिक झाँकी न्ह्यब्वःग’ खः । अथेहे महानगर प्रहरी बलया कवाज व कासा, येँमपां सहरी सेवा नापं सुविधा वितरण व सहरी व्यवस्थापनया निंतिं छ्यलीगु ज्याभः व हलंज्वलं नं न्ह्यब्वःगु खः ।

ज्याझ्वःया झ्वलय् तिंख्यलय् ‘छगू वडा छगू नमूना उत्पादन’ अन्तर्गत उत्पादन जूगु ज्वलं, नेवाः नसाया ब्वज्या नं जूगु खः । अथेहे थन बाबुकृष्ण परियार, इन्द्रकला राई, उर्गेन दोङ्, सुगम पोखरेल एण्ड द बाजागाजा, केहर लिम्बू एण्ड जोय ब्याण्ड, महेस काफ्ले, अस्मिता अधिकारी, कुमाः सागर, दीप श्रेष्ठ, ओमविक्रम विष्ट, जेम्स प्रधान, सुजिल कर्माचार्य, सञ्जय श्रेष्ठ, योगेश्वर अमात्य, रचना रिमाल, सुशान्त घिमिरे, सन्दिप विष्ट, चक्र बमपिंसं सांगीतिक ब्वज्या नं याःगु खः ।