साइकल ट्र्याक निर्माण याइगु

येँ – सरकारं स्वनिगलय् साइकल यात्रीतय् सुरक्षा व सुविधायात ध्यानय् तयाः साइकल ट्र्याक निर्माण याइगु जूगु दु । प्रधानमन्त्री केपी शर्मा ओलीं साइकल यात्रीया सुरक्षा व सुविधा नापं सहज रुपं साइकल यात्रा यायेगु दयेमाःगु अवस्थायात ध्यानय् तयाः महानगर लागाय् साइकल ट्र्याक निर्माण यायेगु ख धयादीगु खः ।

न्हापांगु साइकल दिवसया लसताय् छगू लिखित भिंतुना सन्देश जारी यासें प्रम ओलीं गतिशील मानव जीवनया प्रतीकया रुपय् साइकलयात म्हसीकेगु याना वयाच्वंगु धासें साइकलया प्रयोग यायेगु खँय् सकसितं प्रोत्साहित यायेमाःगु वय्कलं धयादीगु दु ।

लिसें वय्कलं प्रमुख सार्वजनिक यातायात साधनया रुपय् विद्युतीय माध्यमं संचालन जुइगु मोनोरेलया शुरुवात यायेगु नं धयादीगु दु । साइकलया इतिहासयात कयाः थःगु विचाः तयेगु झ्वलय् वय्कलं आरोग्य, कासा, स्वास्थ्य, व्यायामया निंतिं विश्वया न्ह्याथेंज्याःगु थासय् नं साइकल छगू प्रभावकारी व उपयोगी साधनया रुपय् लोकंह्वानाच्वंगु दु धयादिल ।