
किपू – किपू नगरया वातावरणीय अवस्थायात कयाः अध्ययन यायेगु ज्या जुयाच्वंगु दु । नगर दुनेया वातावरणीय अवस्था नापं, समस्या व उकिया समाधानया उपाय मालेगु ल्याखं उगु अध्ययन न्ह्यानाच्वंगु खः ।
किपू नगरपालिकालिसे समन्वय यानाः त्रिभुवन विश्वविद्यालय अन्तर्गतया वातावरण विज्ञान केन्द्रीय विभागपाखें उगु अध्ययन यानाच्वंगु खः । विभागया विद्यार्थीतय्सं उगु अध्ययन यानाच्वंगु खः ।
थ्व सम्बन्धी जानकारी बीगु ल्याखं विभागय् ग्वसाः ग्वःगु छगू ज्याझ्वलय् किपू नगरपालिकाया प्रमुख रमेश महर्जनं किपू देय्या वातावरणीय अध्ययन, समस्या व समाधानय लँपु मालेगु ल्याखं विभागय् अध्ययनरत विद्यार्थीतय्सं यायेत्यंगु खँय् लसता प्वंकादिल । वय्कलं अध्ययन लिपा बीगु निष्कर्षयात आवश्यकथं सम्पादन यानाः सफूया आकार बीगु प्रतिवद्धता नं प्वंकादीगु खः ।
नगर प्रमुख महर्जनं थ्व मात्र छगू अध्ययन जक मखसे त्रिवि व किपूया दथुइ दयाच्वंगु सम्बन्धयात अझ क्वातुका यंकेगु लँपु नं जुइगु विश्वास प्वंकादिल ।
विभागया प्रमुख प्रा. डा. रेजिना मास्के ब्याञ्जुया सभापतित्वय् जूगु ज्याझ्वलय् अध्ययनया उद्देश्ययात कयाः विभागया ब्वँमि बद्री पोखरेलं ज्यापौ न्ह्यब्वयादीगु खःसा नगर उपप्रमुख सरस्वती खड्का, प्रमुख प्रशासकीय अधिकृत कृष्णप्रसाद सापकोटा, वडाअध्यक्ष अमन महर्जन, प्राध्यापक संघया अध्यक्ष प्रा. डा. मोतिलाल शर्मां नं थःथःगु नुगःखँ तयादीगु खः ।
LEAVE YOUR COMMENTS