धर्मचक्र महाविहारय् प्रव्रज्याभिषेक

येँ- थनया वडा नं. २२ य् स्थित धर्मचक्र महाविहार वतुइ प्रव्रज्याभिषेक ज्याझ्वः जुल । नेपालमण्डल येँया शाक्य कुलपुत्र जक प्रव्रज्याभिषेक याइगु झिगू महाविहारमध्ये छगू धर्मचक्र महाविहारय् बौद्ध धार्मिक परम्पराकथं उगु ज्याझ्वः जूगु खः ।

थ्व हे वंगु माघ २६, २७ व २८ स्वन्हुयंकं जूगु प्रव्रज्याभिषेकय् महाविहारया शाक्य कुलपुत्रपिं पूर्व गणेश सम्वेग शाक्य, नुगःरत्न शाक्य व उज्वल शाक्यया बौद्धघ परम्पराकथं प्रव्रज्याभिषेक याःगु खः ।

नेपाल वज्रयान महाविहारया प्रमुख प्रा. डा. नरेशमान वज्राचार्य व राजगुरुजु मञ्जुश्रीरत्न वज्राचार्य आचार्य जुयाः विधिपूर्वक सम्पन्न जूगु प्रव्रज्याभिषेकया इलय् हनुमानध्वाखाया शार्दुल जंग गुल्मपाखें मंगलधुन थानाः लसकुस याःगु खः । उगु इलय् गुल्मया प्रमुख मेजर अशिम श्रेष्ठं लसकुस यासें दान प्रदान नं यानादीगु खः ।

ज्याझ्वःया व्यवस्थापन महाविहारया दुजः गौतमरत्न शाक्यं यानादीगु खः ।