गुरुपिंत हन, ज्यापु दिवसया पाःब्व लःल्हात
येँ- गुरु पुन्हि लसताय् ज्यापु संस्कृति विकास कोषं परम्परागत ख्वीस्वंगू ज्यापु त्वाःया बाजं गुरुपिंत हनेज्या नं याःगु दु । बाजंगुरुपिंत ख्येँ सगं बियाः स्वांमाः क्वखायेका हनेज्या याःगु खः । बाजंगुरुपिंत येँ महानगरपालिकाया उपमेयर हरिप्रभा खड्गी श्रेष्ठं स्वां लःल्हानादीगु खः ।
मंगलवाः जूगु थुगु हे ज्याझ्वलय् झिंखुक्वःगु ज्यापु दिवस हनेगु निंतिं पाब्वः नं लःल्हाःगु दु । ज्याझ्वलय् मू पाहाँ येँ महानगरपालिकाया मेयर विद्या सुन्दर शाक्यं गोफः त्वाः माकः गल्ली ज्यापु समाजयात ने.सं. ११४० या ज्यापु दिवस हनेगु पाःब्वः लःल्हानादिल । ज्याझ्वलय् गोफः त्वाःया नायः गोविन्द महर्जनयात पाःब्वः ल्हाःगु खःसा कोषया न्वकु सन्त महर्जनं ज्यापु दिवस हनेगु निंतिं छगू लाख तकाया चेक नं लःल्हानादिल ।
ज्याझ्वलय् न्ववासें मेयर शाक्यं थगुने निसें महानगरपालिकां बाजंगुरुपिंत हनेज्या सुरु यानागु लुमंकुसें थ्व ज्या थुगुसी नं जुइगु व लिपा नं निरन्तर न्ह्याइगु खँ धयादिल । लिसें वय्कलं सरकारं हःगु गुथि विधेयक लित कायेगु निंतिं थम्हं नं प्रधानमन्त्री लिसें राष्ट्रपतियाथाय् तक वनाः पहल यानागु खँ कनादिल ।
ज्याझ्वःया सभापति व विकास कोषया न्वकु सन्त महर्जनं झिंछदँ न्ह्यवनिसें परम्परागत ज्यापु त्वाःया गुरुपिंत हनेगुज्या सुरु यानागु खँ कनादिल । अथेहे वय्कलं येँ महानगरपालिका, प्रधानमन्त्री पाखें वःगु ग्वाहालिं ६० लाख तकाया कोष दयेधुंकूगु खँ न्ह्यथनादिसें आः कोषं थीथी एकेदेमिक ज्या नं याना वनेगु खँ कनादिल ।
ज्याझ्वलय् उपमेयर हरिप्रभा खडगी श्रेष्ठया लिसें ज्यापु महागुथि नेपाःया केन्द्रीय नायः राजभाइ जकःमि, येँ महानगर समितिया कार्यवाहक नायः नानीहिरा महर्जनपिंसं नं न्ववानादीगु खः ।
LEAVE YOUR COMMENTS