१५ वडाय् छेँय् छेँय् खाद्यान्न थ्यंकेत पुचः गठन याइगु

येँ – महानगरपालिका १५ वडाय् कोरोना भाइरस संक्रमणया इलय् वडाय् वयेफुगु संकटया अवस्थाय् सामाजिक जनचेतना बीगु, आपतकालीन अवस्थाय् यायेमाःगु ज्या व संक्रमण लिसे ल्वायेत तयार याःगु दीर्घकालिन योजना बारे सहलह जूगु दु ।

सोमवाः छाउनी ब्यारेकया रेञ्जर रेजिमेन्टय् जूगु बैठकय् १५ वडाया अध्यक्ष व येँ मनपाया प्रवक्ता ईश्वरमान डंगोल, १५ वडाया सदस्यपिं, महानगरीय प्रहरी बृत्त स्वयम्भूया प्रमुख डिएसपी लालध्वज सुवेदी, शसस्त्र बल हेडक्वार्टरका डिएसपी सुमन जंग थापा, रेञ्जर फस्र्ट बटालियनया गणपति कर्णेल नानु खड्का, रेञ्जर रेजिमेन्टया मेजर सिताराम बस्नेत लिसें स्थानीय थीथी क्लबया स्वयंसेवकतय् उपस्थिति दुगु खः ।

सहलहं खाद्यान्न संकट व संक्रमण न्यूनीकरण गर्न दैनिक जीवनयापनयात माःगु न्यूनतम खाद्यान्नयात न्यूनतम भावं छेँय् छेँय् थ्यंकेगु निंतिं वडास्तरीय छगू पुचः गठन यायेगु क्वःछिउगु दु । उगु पुचलय् नेपाली सेना, शसस्त्र प्रहरी बल व नेपाल प्रहरीया प्रतिनिधि नं दुथ्याइ ।
सहलहया झ्वलय् कोरोना संक्रमण सुरक्षार्थ रेञ्जर रेजिमेन्टपाखें दयेकूगु पर्सनल प्रोटेक्टिभ इक्यूप्मेन्ट (पीपीई)या प्रदर्शन नं याःगु खः ।