नकली नोट छापे याइपिं ज्वन

येँ- प्रहरीं नक्कली नोट सहित न्याम्हेसित ज्वंगु दु । महानगरीय प्रहरी वृत्त बौद्धया पुचलं बुढानिलकण्ठ नगरपालिका–११ कपनय् च्वंगु समरोज थापामगरया क्वथां नक्कली नोट छापे यानाच्वंगु इलय् कलर प्रिन्ट सहित ज्वंगु खः । प्रहरीया कथं ज्वंपिं गोमा श्रेष्ठ, पुष्पा थापामगर, समरोज थापामगर, चिरञ्जीवी जोती व सुजन जोती खः ।

गोमा श्रेष्ठं नक्कली नोट ज्वनाः बजारय् सामान न्यानाच्वंगु अवस्थाय् श्रेष्ठयात शंका जुयाः खानतलासी यायेगु झ्वलय् नक्कली नोट सहित ज्वंगु खः । श्रेष्ठयात ज्वनेधुंकाः अनुसन्धानया झ्वलय् थप प्यम्हेसित ज्वंगु खः ।

उमिगुपाखें प्रहरीं सक्कली थें खनेदुगु ६५,३३५ नक्कली नोट, नोट छापे यायेगु प्रिन्टर, भ्वं, भ्वं टिकेत छ्यलीगु फेविकल, निगः स्वंगः मोबाइल व लालीगुराँस छाप दुगु छाप बरामद याःगु दु ।