निर्वाचन आयोगयात जसपाया खेद

येँ – जनता समाजवादी पार्टी (जसपा) या अध्यक्ष उपेन्द्र यादवं थःगु पार्टीया मेम्ह अध्यक्ष महन्थ ठाकुर लगायत प्यम्ह नेतातय्त यानागु कारबाहीयात मान्यता मबीगु निर्वाचन आयोगया निर्णयया कारणं थ्व आयोगया तटस्थता व निष्पक्षताय् गम्भीर न्ह्यसः ब्वलंगु खँ धयादीगु दु ।

म्हिगः वयक्लं छगू विज्ञप्ति पिकासें राजनीतिक दलया बहुमतया निर्णय मान्य जुइगु लोकतान्त्रिक मूल्य मान्यता, विधि व पद्धतिया अवज्ञा याःगुलिं निर्वाचन आयोगप्रति खेद प्वंकागु खँ धयादीगु दु ।
प्रेस विज्ञप्तिइ धयातःगु दु, ‘निर्वाचन आयोग थेंज्याःगु संवैधानिक निकाय पूर्वाग्रह रहित जुयाः निष्पक्ष ढंगं निर्णय यायेमाःगुली एकपक्षीय कथं याःगु निर्णय जिमिति मान्य जुइ फइ मखु, व थुकिं निर्वाचन आयोगया तटस्थता व निष्पक्षताय् गम्भीर शंका ब्वलंगु दु ।’

आयोगया उगु निर्णयया कारणं पार्टी दुने अनुशासनहिनता अप्वयेफु धासें विज्ञप्तिइ निर्वाचन आयोगया उगु निर्णयं राजनीतिक दल सम्बन्धी ऐन २०७३, राजनीतिक दल सम्बन्धी नियमावली २०७४ व जसपा नेपालया अन्तरिम विधान २०७७ यात थःगु सुविधा कथं बेक्वयेकाः पार्टी विधानया अःखः ज्या याइपिं, दलया आचारसंहिता पालना मयाइपिं, अराजक लिसें अनुशासनहिन पदाधिकारी व कार्यकारिणी दुजःपिंत परोक्ष रुपं वैधानिकता बीत्यंगु खनेदु धयातःगु दु ।

उकथं हे माओवादी केन्द्रया नेता नारायणकाजी श्रेष्ठं नं आयोगया निर्णययात विरोध प्वंकादीगु दु । वय्कलं म्हिगः छगू ट्वीट यासें जसपा विवादया बारे आयोग सरकारया कठपुतली खः धकाः पुष्टि जूगु टिप्पणी यानादीगु दु ।

वय्कलं धयादीगु दु, ‘निर्वाचन आयोग सरकारया कठपुतली जुयाः कानुन व लोकतन्त्रया धज्जी ब्वयेकाच्वंगु दु । संवैधानिक आयोगया थज्याःगु ज्या लज्जास्पद व भत्र्सनायोग्य जू । जसपा सम्बन्धी निर्णयया कारणं थ्व खँ स्पष्ट जूगु दु कि नेकपाया बारे नं थज्याःगु हे निर्णय याःगु खः ।’