चैत दुने मेलम्चीया लः हयेगु तयारी

येँ – सरकारं वइगु चैत महिनाया दुने मेलम्चीया लः स्वनिगलय् हयेगु तयारी यानाच्वंगु दु । चैत दुने लः वःसां थ्व अस्थायी जक जुइगु खँ मेलम्ची खानेपानी विकास समितिया अधिकारीतय्सं धाःगु दु ।

दछि न्ह्यः लः हयेगु सुरु जुइधुंकूसां वंगु मनुसनय् वःगु खुसिबालं चुइकाहःगु ल्वहतं मेलम्चीया सुरुङ्ग प्वाःतिना बीवं लः हयेगु बन्द जुयाच्वंगु दु । आः सुरुङय् थानाच्वंगु ल्वहं चिइकाः लः हःसां थथे यानाः वइगु मनसुन तक जक लः हइगु खँ धाःगु दु ।

मेलम्ची खानेपानी विकास समितिया कथं मौसम विभागं मनसुन सुरु जुइन धयागु जानकारी बीवं लः हयेगु बन्द याइ । वइगु मनसुनया इलय् नं खुसिबाः वयाः सुरुङयात गज्याःगु प्रभाव लाकी स्वयेधुंकाः जक स्थायी रुपं लः हयेगु निंतिं दयेकेज्या न्ह्याइगु खँ धाःगु दु ।

समितिया सुचना अधिकारी राजेन्द्रप्रसाद पन्तं चैत दुने लः हयेगु निंतिं ठेकेदार कम्पनीं सुरुङ्गया ल्वहं चिइकेगु ज्या निवाः न्ह्यव निसें सुरु यायेधुंकूगु जानकारी बियादीगु दु । वय्कःया कथं सतहय् दुगु गेगरान चिइकेधुंकूगु दुसा दुने ततःग्वःगु ल्वहं दुगुलिं उकियात विस्फोट यानाः तछ्यायेमाःगु अवस्था दु । आः विस्फोट यायेगु निंतिं विस्फोटक पदार्थ छ्यलेगु निंतिं अनुमति कायेगु ज्या न्ह्यानाच्वंगु वय्कलं कनादीगु दु ।

समितिया कार्यकारी निर्देशक बासुदेव पौड्यालं दछि न्ह्यव हे स्वनिगलय् लः हयेगु ज्या जुइधुंकूगुलिं आः सुरुङय् च्वंगु गेगरान जक चिइकेवं लः हयेफइगु खँ धयादीगु दु । वय्कलं थगुने गुकथं लः वःगु खः व हे प्रक्रियां लः वइगु खँ धयादीगु दु ।

चैत दुने स्वनिगलय् लः हयेगु योजना कथं ज्या न्ह्यानाच्वंगु खँ कनादिसें वय्कलं धयादीगु दु, ‘थन यायेमाःगु ज्या ला यक्व दनि, अय्सां न्हापांगु प्राथमिकता लः हयेगु हे जूगुलिं उकथं हे ज्या न्ह्यानाच्वंगु दु ।’
वय्कःया कथं खुसिबालं यानाः थगुने लः छ्वयाहःगु सुरुङया म्हुतुप्वाः हे तिनाच्वंगु दुसा लः नियन्त्रण याइगु ९ नम्बर गेट नं प्वाःतिनाच्वंगु दु । अथेहे अडिट टनेल धाइगु परीक्षणया निंतिं दयेकूगु सुरुङया म्हुतुप्वाः नं तिनाच्वंगु दु । आःयात थ्व स्वंगुलिं थासय् लः वयेत पंगः जुयाच्वंगु ल्वहं जक चिइकीगु, तर स्थायी रुपं लः हयेगु निंतिं ज्या मजुइगु खँ वय्कलं धयादीगु दु ।

सम्बन्धित बुखँ

LEAVE YOUR COMMENTS