प्रमयात वालुवाटारं पिहां मवनेत सुझाव

येँ – प्रधानमन्त्री केपी ओलीयात आः अप्वः दौडधूप मयासे वालुवाटारय् हे च्वनाः सरकार चले यायेत चिकित्सकतय्सं सुझाव बिउगु दु । तर वय्कलं उगु सुझावयात पालना धाःसा याना मदीगु खँ चिकित्सकतय्सं धाःगु दु । थनिं लत्या न्ह्यः टिचिङ अस्पतालय् भर्ना जुयादीगु इलय् वय्कःयात चिकित्सकतय्सं थ्व सल्लाह बिउगु खः ।

संसारय् आपालं सरकार प्रमुखतय्सं छेँय् हे च्वनाः शासन व प्रशासनया ज्या याःगु उदाहरण दु धासें प्रम ओलीयात नं आः सिंहदरवार
वनेगु हे बन्द यानाः वालुवाटारं तुं सम्पूर्ण ज्याखँ यायेत चिकित्सकतय्सं सुझाव बिउगु खः ।चिकित्सकतय् कथं पिहां वनेबलय् धपेडी जक मखु इन्फेक्सनया नं खतरा जुइगु जुयाः वय्कःयात वालुवाटारय् जक च्वनेत इनाप याःगु खः ।

४० न्हु न्ह्यः बांलाक वासः यानाः लिहां झाःम्ह प्रम ओली म्हिगः हानं टिचिङ झायाः स्वास्थ्य परीक्षण यानादीगु खः । अन वय्कःया इसीजी व इको याःगु खः । थ्व निगुलिंया रिपोर्ट बांलाक हे वःगु खँ वय्कःया उपचारय् संलग्न डा. अरुण साय्मिं कनादीगु दु । थ्व स्वयां न्ह्यः अस्पताल भर्ना जुयादीगु इलय् वय्कःया बारे अनर्गल खँ समेत प्रचार जूगु खः ।

तर उगु इलय् नं वय्कः धाःसा चुस्त हे जुयादीगु खः । अनावश्यक प्रचार जुइवं आपालं नेतात वय्कःयात झुलुक्क छकः जक जूसां स्वये धाधां नापलाः वःगु खः । तर अथे नापलाः वइपिं नेतातलिसे नं ओलीं धाःसा १५–२० मिनेट खँ ल्हाना बीगु खँ डा. साय्मिं कनादीगु दु । थुकिं यानाः नं वय्कःया स्वास्थ्यय् कडा निगरानी यायेमाःगु अवस्था पिहां वःगु खः ।

म्हिगः नं वय्कःयात अप्वः दौडधूप याये मजिल धकाः चिकित्सकतय्सं ‘कडा’ सुझाव बिया छ्वःगु खँ सीदुगु दु । प्रम ओली बहनी लिबाक तकं मनूत नापलानाः च्वंच्वनीगु व तसकं कम जक द्यनीगु जूगुलिं वय्कःयात थ्व बानी सुधार यायेत नं चिकित्सकतय्सं सुझाव बिउगु दु ।

सम्बन्धित बुखँ

LEAVE YOUR COMMENTS