भ्यू टावरया खँ छु जुल ?

येँ – येँया पुलांगु बस पार्कया थासय् तजाःगु भ्यू टावर दयेकेगु धकाः शुरु जूगु निर्माणया ज्या येँ मनपाया लागिं कपाः स्याःगु विषय जूगु दु । उगु भ्यू टावर दयेकेगु लागिं ठेकेदारं ज्या जिम्मा काःसां नं निर्माण ज्या धाःसा बांलाक मन्ह्याकूगु कारणं यानाः उगु निर्माण हे बन्द याये माःगु बिचाः मनपाय् छथ्वःसिनं तयाच्वंगु दुसां मेगु छथ्वः धाःसा ठेकेदारयात ज्या याके बियाः भ्यू टावर दयेके हे बीमाः धइगु पक्षय् वनाच्वंगु खँ सीदुगु दु ।

सूत्रतय्सं धाः कथं छगू इलय् अन भ्यू टावर दयेकेत्यंगुया विरोधय् स्थानीय जनता हे दना वसेंलि येँ मनपाया मेयर विद्यासुन्दर शाक्यं उकियात निर्माण रोक्का यायेगु पहल यानादीगु खः । तर ठेकेदारयात ज्या दिके बीबलय् वं खर्च जूगु दांया क्षतिपूर्ति माल धकाः अदालतय् मुद्दा तया बिल धाःसा मनपायात समस्या जुइ धकाः उकिया कानुनी पक्ष छु दु धकाः बुझे याके बियादीगु दु ।

न्हापा उगु भ्यू टावर दयेकेगु शुरु जूबलय् विरोध याःवःपिं मनूत थौंकन्हय् विरोधय् कुहां मवयाच्वंगु नं आः वयाः आश्चर्यया विषय जुयाच्वंगु खँ सूत्रं धाःगु दु । थौंकन्हय् उगु भ्यू टावरया विरोधय् सुनां छुं हे न्वमवानाच्वंगु कारणं येँ मनपाय् उकियात ज्या याके बीगु वा मबीगु धइगु खँय् समेत अन्यौल जुयाच्वंगु नं सूत्रं धाःगु दु । भ्यू टावर दयेकाच्वंगु थाय् येँ मनपाया उपमेयर हरिप्रभा खड्गी श्रेष्ठया थःगु वडाय् लाःगु जुयाः थुकिया बारे निर्णय यायेत वय्कःया समेत साथ माःगु खँ मनपा सूत्रं धाःगु दु । भ्यू टावर दयेकेगु ठेक्का लाकूम्ह पुलांम्ह ठेकेदार आः थ्व ज्या मेम्ह ठेकेदारयात ‘मीधुंकूगु’ खँ नं सूत्रं धाःगु दु ।

उखे पुलांगु बस पार्क स्यंकाः भ्यू टावर दयेकाच्वंगु जुयाः न्हापा अन दिकेगु यानाच्वंगु सवारी साधन फुक्क खुल्लामञ्चय् दिकेगु याःगुलिं उकिं यानाः हानं धू व ध्याचःया मेगु समस्या सिर्जना जुयाच्वंगु दु ।