परम्परागत नेवाः वसः सुज्या तालिम

किपू- किपू नगरपालिकां न्ह्याकाच्वंगु परम्परागत नेवाः वसः सुज्या तालिम क्वचाःगु दु । किपू नगरपालिका वडा नं. १० य् न्ह्यानाच्वंगु स्वलायंकंया नेवाः वसः सुज्या तालिम वंगु बुधवाः क्वचाःगु खः ।

नगरपालिकां परम्परागत नेवाः वसः पुनेगु ने तना वनीगु जकं खःला धइगु ग्याःचिकुयात ध्यानय् तयाः थुगु प्रशिक्षण बिउगु खः ।
नेवाः वसः नेवाःतय् जक मखसे राष्ट्रया हे पहिचान जूगु धासें थुकियात ल्यंका तयेगु नापं व्यावसायिक रुपं हे थुकिया प्रवद्र्धन यायेगु ताः तयाः वसः सुज्या तालिम न्ह्याकूगु खः । क्वय्ना गणेद्यःया पुजा यानाः न्ह्याःगु तालिम समापन ज्याझ्व ६ नं. वडाया सभाकक्षय् जूगु खः ।

ज्याझ्वलय् किपू नगरपालिकाया प्रमुख रमेश महर्जनं स्वलायंकं जूगु तालिमं पूवंके सयेके फइमखु धासें थ्व तालिम जक समापन जक खः धाथें ला ज्या यायेगु दिं शुरु जूगु दु धयादिल ।

‘बांलाक ज्या सयेकेत निपाः प्यपाः लं सुया स्वयेमाः । थथे यायेबलय् स्यन धकाः नुगः क्वतुंकेमाःगु’ नगर प्रमुख महर्जनं धयादिल, ‘मेहनत याना वन धाःसा ज्या सयेके फइ, अवश्य नं सफल जुइ ।’

उपप्रमुख सरस्वती खड्कां परिवारय् मिसापिं उद्यमशील जुल धाःसा परिवार हे बांलाइ धासें सकलें नगरवासीया ल्हातय् सीप तयाबीगु नगपाकिाया दायित्वकथं हे थुगु तालिम न्ह्याकागु खँ कनादिल । थःके दुगु सीपयात व्यावहारिक रुपय् छ्यला यंके फत धाःसा थुकिं आम्दानी नं याये फइ धासें तालिमय् सयेकागु ज्ञानयात व्यावहारिक रुपं छ्यलाबुलाय् हयेत इनाप यानादिल ।

नगर प्रमुख महर्जन, उपप्रमुख खड्का, वडाअध्यक्षपिं हर्ष महर्जन, रमेशमान डंगोल, राजेन्द्र महर्जन, राजेन्द्र बानियाँ, गंगाराम महर्जनं प्रशिक्षार्थीपिंत दसिपौ लःल्हानादीगु तालिम समापन ज्याझ्वलय् ६ वडाअध्यक्ष न्हुछेबहादुर महर्जन, प्रशिक्षार्थी हिसिला महर्जनं नुगःखँ तयादीगु खः ।

१० वडाअध्यक्ष अमन महर्जनया सभापतित्वय् प्रशिक्षक नारायण कपालीयात मतिनाया चिं नं लःल्हाःगु ज्याझ्वलय् १० वडा सदस्य चिनीकाजी श्रेष्ठं लसकुस यानादीगु खः।