रत्न मन्दिरयात संग्रहालय दयेकीगु

येँ – पोखराया फेवातालय् सिथय् च्वंगु रत्न मन्दिरयात आः संग्रहालयया रुपय् विकास याइगु जूगु दु । गण्डकी प्रदेश सरकारं रत्न मन्दिरयात संग्रहालयया रुपय् विकास यायेगु तयारी याःगु खः । रत्न मन्दिर नापं हिमागृह सर्वसाधारणया निंतिं खुल्ला यानाः उकियात पर्यटकीय गन्तव्यया रुपय् विकास यायेगु तयारी गण्डकी प्रदेश सरकारं याःगु खः ।

मदुम्ह जुजु वीरेन्द्र शाहया नामय् दुगु रत्न मन्दिर २०६३ सालया राजनीतिक हिउपाः लिपा नेपाल सरकारं नेपाल ट्रष्टया स्वामित्वय् हयेगु निर्णय याःगु खः । थौकन्हय् ट्रष्टया मातहतय् दुगु रत्न मन्दिर व हिमागृहयात केन्द्र सरकार नापं आवश्यक सहलह यानाः पर्यटकीय गन्तव्यया रुपय् विकास यायेगुकथं तयारी जुयाच्वंगु गण्डीक प्रदेशया उद्योग, पर्यटन व वातावरणमन्त्री विकास लम्सालं कनादीगु दु ।

२०६७ सालंनिसें नेपाल ट्रष्टया स्वामित्वय् दुगु करिब १११ रोपनी क्षेत्रफलय् न्यनाच्वंगु रत्न मन्दिर पूर्व राजपरिवारं चिकुलाया इलय् विदा माने यायेगु थाय्कथं छ्यला वयाच्वंगु खः । शाहवंशया अन्त्य लिपा ट्रष्टया स्वामित्वय् वयेधुंकाः रत्न मन्दिरयात राजतन्त्रया हे प्रतीकया रुपय् संग्रहालय दयेकाः सर्वसाधारणया निंतिं खुल्ला यायेमाःगु माग स्थानीयतय्सं ताःई न्ह्यवंनिसें यानावयाच्वंगु खः ।