छु स्वनिगलय् सामुदाय स्तरय् संक्रमण जुइधुंकूगु खः ला ?

येँ (नेपालभाषा टाइम्स) – म्हिगः बुधवाः न्हिछिया दुने नेपालय् थप ४८२ म्हेसिके कोरोना भाइरस संक्रमण जूगु पुष्टि जुल । थुकी स्वनिगःया येँ, यल व ख्वपय् यानाः झिंखुम्ह लाःगु दु । म्हिगः जक येँय् झिम्ह संक्रमित लूगु दुसा ख्वपय् छम्ह, यलय् न्याम्ह संक्रमित जूगु पुष्टि जुल ।

देय्न्यंकं न्हियान्हिथं कोरोना भाइरस संक्रमिततय् ल्याः अप्वया वनाच्वंगु अवस्थाय् स्वनिगः नं थुकिं पिने लानाच्वंगु मदु । स्वास्थ्य तथा जनसंख्या मन्त्रालयया कथं वंगु च्यान्हु दुने स्वनिगलय् जक ६० म्हेसिके संक्रमण पुष्टि जुइधुंकूगु दु ।

स्वनिगलय् मंगलवाः झिंप्यम्हेसिके संक्रमण खने दुगु खःसा बुधवाः झिंखुम्हेसिके खनेदत । न्हियान्हिथं संक्रमिततय् ल्याः अप्वया वनाच्वंगु दु । सोमवाः संक्रमण  जूगु पुष्टि जूपिं मध्ये छम्ह ला स्वनिगलं पिने गनं हे पिहां मवंम्ह जूगु खँ स्वास्थय मन्त्रालयया प्रवक्ता डा. जागेश्वर गौतमं धयादीगु दु । गागलफेदीया छम्ह न्यादँ दुम्ह मचायाके ज्वरो व सासः ल्हायेत समस्या जुइवं अस्पताल यंकाः परीक्षण याःबलय् कोरोना संक्रमण जूगु पुष्टि जूगु खः ।

अथे खःसा छु स्वनिगलय् समुदाय स्तरय् कोरोना भाइरस संक्रमण न्यनावंगु संकेत खः लासा थ्व ? सरकारी अधिकारीतय्सं धाःसा आः थथें छुं धायेफुगु अवस्था मदु धयादीगु दु । प्रवक्ता गौतमं बिबिसीलिसे खँ ल्हासें धयादिल, ‘येँ सोमवाः पोजिटिभ पुष्टि जूपिं खुम्ह मध्ये न्याम्हेसिके ट्राभल हिस्ट्री खनेदतसा छम्हेसिक छुं हे ट्राभल हिस्ट्री मदु । सुं न सुं पाखें सरे जूगु जुइमा, जिमिसं थ्व पत्ता लगे यायेत स्वयाच्वनागु दु । थ्व लिपा जक धायेफइ ।’

गुलिखे संक्रामक ल्वय्या विशेषज्ञतय्सं न्हापा नं समुदाय स्तरय् जुइफुगु संक्रमणया छुं संकेत खनेदुगुलिं आः वयाः समुदायस्तरय् न्यन कि मन्यंनी धकाः बहस यानाच्वनेगु आवश्यक मजूगु खँ धयाच्वंगु दु । संक्रामक रोग विशेषज्ञ डा. अनुप सुवेदीं धयादिल, ‘छुं न्हि न्ह्यव जक येँ महानगरपालिकाया सरसफाइ कर्मचारीत मध्ये यक्वसिया आरडीटी पोजिटिभ खनेदत । शतप्रतिशत हे मिले मजू धयागु जुइमखु । कोरोनां सीगु घटना नं जुया हे च्वंगु दु । उकी आः वयाः समुदायस्तरय् कोरोना संक्रमण न्यन कि मन्यंनी धकाः बहसय् तक्यनाच्वनेगु धयागु संक्रमणविरुद्धया ज्यायात हे प्रभावित यायेगु जुइ ।’

मंगलवाः येँय् छगू ज्याझ्वलय् न्ववानादिसें स्वास्थ्य तथा जनसंख्या मन्त्री भानुभक्त ढकालं नेपालय् संक्रमणया पुष्टि जूपिं मध्ये ९४ प्रतिशत पिनें वःपिंके व ६ प्रतिशत समुदायस्तरय् संक्रमण जूगु लूगु खँ धयादीगु खः ।

विशेषतः लकडाउन छ्वासुके धुंकाः मनूतय् गतिविधि अप्वया वःगुलिं संक्रमण न्यनीगु खः ला धयागु चिन्ता जुयाच्वंगु दु । भाइरोलोजिस्ट डा. लुना भट्ट शर्मां थज्याःगु चिन्ता स्वाभाविक जूगु धयादी । ‘सामाजिक  दूरी कायम यायेगु, मास्क तयेगु थेंज्याःगु ज्या नं नाला कयाच्वंगु खनेमदु, थुकिं संक्रमणया खतरा अप्वयेकी’,  वय्कलं धयादीगु दु । उकिं डा. सुवेदीया सुझाव दु, ‘अस्पतालय् यक्व ल्वगि थ्यंकेम्वाःगु अवस्था गुलि वये केफत उलि बांलाइ, थुकिया निंतिं मनूतय्सं सामाजिक दूरी कायम यायेमाल, मास्क तयेगु पालना यायेमाल ।’

सम्बन्धित बुखँ

LEAVE YOUR COMMENTS