ने. सं. ११४४ ञलाथ्व नवमी -

थनिनिसें जोरविजोर चीकीगु

येँ – कोभिड–१९ संकट व्यवस्थापन समन्वय केन्द्र (सीसीएमसीसीं) थनिनिसें जोर विजोर प्रणाली चीकीगु जूगु दु । म्हिगः च्वंगु बैठकं थनिनिसें जोरविजोर प्रणाली चीकेत गृह मन्त्रालययात सिफारिस याःगु खः ।

स्वनिगःया जिल्ला प्रशासन ज्याकुथि–तय्सं थ्व स्वयां न्ह्यः कोरोना जोखिम क्यनाः ट्याक्सी व निजी सवारी साधनय् जोर विजोर प्रणाली लागू याना वयाच्वंगु खः । तर थुकियात कयाः तच्वःगु विरोध नं जुया वयाच्वंगु खः ।

फागुन १ गते निसे भौतिक रुपय् विद्यालय चायेकेत नं सीसीएमसीसीं सरकारयात सिफारिस याःगु दु । सीसीएमसीसीया म्हिगः च्वंगु बैठकं विद्यालय चायेकेगु निर्णय कार्यान्वयनया निंतिं सरकारयात सिफारिस याःगु खः ।

देय्न्यंकं कोरोना संक्रमण अप्वया वनेवं सरकारं माघया न्हापांगु वालंनिसें विद्यालय बन्द याःगु खः । न्हापांगु चरणय् माघ १५ गते तकया निंतिं विद्यालय बन्द याःगु खःसा वयां लिपा सीसीएमसीसीया हे सिफारिसय् माघ मसान्त तक बन्द यायेगु निर्णय याःगु खः ।

लिपांगु इलय् कोरोना संक्रमण दर म्हो जुया वनाच्वंगु व देय्न्यंकंया स्थानीय तहं सरकारया निर्णय अवज्ञा यासें विद्यालय चायेकेगु निर्णय यायेवं सीसीएमसीसीं फागुन १ गते निसें भौतिक रुपय् विद्यालय चायेकेगु निर्णय याःगु खः । विद्यालय बन्द जुयाः विद्यार्थीया शिक्षाय् लिच्वः लाःगु धासें शैक्षिक संघसंस्था व अभिभावकपिसं नं विद्यालय चायेकाः भौतिक रुपं ब्वंकेबीमाःगु माग याना वयाच्वंगुलिं नं विद्यालय चायेकेगु निर्णय याःगु खः ।