कोशी उच्चबाँधय् भारत धेत्ताहा

येँ – नेपाःया सप्तकोशी खुसिया बराह क्षेत्रय् नेपाः व भारत जानाः दयेकीगु धकाः ताः इलंनिसें चर्चाय् वयाच्वंगु उच्चबाँध सम्बन्धी वार्तायात नेपाःया अधिकारी–तय्सं हानं छक्वः असफल याना बिउगु दु । थ्व बाँध न्ह्याथे यानाः नं दयेके माली धकाः भारतीय पक्ष कस्से जुयाः वःगु खःसां नेपाली पक्षं थःपिंसं जक थुकिया बारे निर्णय याये फइ मखु धकाः आलटाल यायेवं वार्ता हे त्वाःदःगु खः ।

थ्व उच्चबाँध निर्माण बारे ज्या यायेत धकाः गठन यानातःगु नेपाः व भारतया मंकाः समितिया म्याद क्वचाइ थे च्वनेवं भारतं बाँध निर्माणय् याकनं सहमति कायेत स्वःगु खः । तर नेपाःया पक्षं बाँध निर्माण जक मखु थ्व मंकाः समिति समेत भंग याना छ्वःसां जिउगु संकेत बिउगु खँ सीदुगु दु ।

भारतय् दँय्दसं वइगु खुसिबाः नियन्त्रण यायेगु लागिं थनिं ७० न्ह्यः कोशी खुसिइ २६९ मिटर तजाःगु उच्चबाँध दयेकेगु प्रस्ताव न्ह्यःने वयाच्वंगु खः । तर लिपा भारतं कोशी ब्यारेज दयेकेवं थ्व बाँधया खँ तना वंगु खःसां लिपा गिरिजाप्रसाद कोइराला प्रधानमन्त्री जुइधुंकाः भारतं थ्व मुद्दायात हानं थना हःगु खः ।

तर उगु लागाया स्थानीय जनतां धाःसा छगू कोशी बाँधया कारणं यानाः नेपाली जनतां थुलि सास्ती नये मालाच्वंगु दुसा झन उच्च बाँध दयेकल धाःसा झन् हे तःधंगु सास्ती नये माली धकाः थुकिया विरोध याना वयाच्वंगु दु ।

थ्व थासय् येँदेय्या धरहरा सिबें नं निदुगं तजाःगु बाँध दयेकाः लः पनेगु व उगु लःयात मत व सिँचाईया लागिं प्रयोग यायेगु धकाः भारतं प्रस्ताव तयाच्वंगु दु । तर नेपाःया पक्षं बाँधया बारे भारतयात पत्याः याये फइगु आधार मदु धासें न्हापा सम्झौता जू कथं पञ्चेश्वर परियोजना निं दयेकि, वयां लिपा कोशीया उच्चबाँध बारे बिचाः याये धइगु सन्देश छ्वया तःगु खँ सीदुगु दु ।