स्थानीय तहलय् सीमित सेवा : यातायात, जात्रापर्व, पसःबजाः बन्द यायेत इनाप

येँ (नेपालभाषा टाइम्स) स्वनिगःया ‘नगरपालिका मेयर फोरम’ स्वनिगलय् स्थानीय तहपाखें बीगु अत्यावश्यक बाहेकया फुक्कं सेवा स्ववाःया निंतिं बन्द यायेगु निर्णय याःगु दु ।

म्हिगः च्वंगु फोरमया बैठकं उगु निर्णय याःगु खः । म्हिगः बैठक पत्रकार सम्मेलन यासें फोरमया सचिव लिसें मध्यपुर थिमि नगरपालिकाया मेयर मदनसुन्दर श्रेष्ठं स्वनिगः दुने समुदायस्तरय् कोरोना खने दुगुलिं भीडभाड म्हो याये माःगु जुयाः अत्यावश्यक बाहेक मेगु सेवा बन्द यायेगु खँ कनादिल ।

म्हिगःया बैठकं सार्वजनिक यातायात पूर्ण रुपं सञ्चालन जुइधुंकाः संक्रमण तीव्र गतिइ न्यना वंगुलिं सार्वजनिक यातायात सञ्चालन नं भदौ १५ गते तक पूर्ण रुपं बन्द यायेत सरकारयात इनाप यायेगु निर्णय नं याःगु दु। कलकारखाना, उद्योग निर्वाध रुपं सञ्चालनय् वयाः मजदुरतय् न्हिथं वये–वनेगु जूगुलिं संक्रमणया जोखिम अप्वया वंगुलिं कलकारखाना दुने हे क्वारेन्टाइनया व्यवस्था यायेमाःगु व स्वास्थ्य मापदण्ड पूवंकाः जक कारखाना सञ्चालन याके बीगु निर्णय नं म्हिगःया बैठकं याःगु दु । अथे हे सामाजिक सुरक्षा भत्ता नवीकरण यायेगु म्याद साउन मसान्त तक जक दुगुलिं उकियात असोज मसान्त तक कायम यायेत नं सरकारयात इनाप याःगु दु ।

स्वनिगः तसकं घनावस्ती दुगु शहर जूगुलिं कोरोना संक्रमण समुदायस्तरय् थ्यने फइगु जुयाः स्वनिगलय् दुहां वइगु नाकाय् कडा यायेत नं सरकारयात इनाप यायेगु निर्णय फोरमं याःगु दु। उकथं हे क्वारेन्टाइन व्यवस्थापन व सञ्चालन नियमावली कथं एकीकृत क्वारेन्टाइन संघीय सरकारं यायेगु व स्थानीय तहं व्यवस्थापनय् ग्वाहालि यायेगु निर्णय नं फोरमं याःगु दु ।

अथेहे बैठकं सरकारया समर्थन व विरोधय् र्‍याली, भेला, अनसन, जुलुस लगायतया गतिविधिइ कडाइपूर्वक निषेध यायेगु व भीड जुइगु सांस्कृतिक गतिविधि जात्रा पर्वयात पनेत नं सरकारयात इनाप यायेगु निर्णय फोरमं याःगु दु । उकथं हे माक्स मतसे जुइपिंत व पाय्छि कथं मास्क मतइपिंत कारबाही यायेगु विषयय् नं समन्वय यायेगु निर्णय फोरमं याःगु दु। उकथं हे ठेलगाडा व साइकलपाखें याइगु व्यापार व्यवसाययात नं भदौ १५ गते तक बन्द यायेगु निर्णय नं फोरमं याःगु दु ।

पीसीआर सिबें कडाईलय् बः
देशय् पीसीआर परीक्षण अप्वयेकेमाः धकाः सः थ्वयाच्वंगु खँय् धाःसा फोरमं पीसीआर परीक्षण तत्कालिन अवस्थाया लागिं जक जूगुलिं थ्व स्वयां नं ल्वय् हे जुइके मबीगु ज्याय् अप्वः ध्यान बीमाःगु निर्णय नं याःगु दु। थुकिया लागिं पिनें वइपिं मनूतय्त कडाइपूर्वक पने माःगु व उकिया लागिं नाकाय् कडा यायेत नं फोरमं सरकारयात इनाप याःगु दु। पीसीआर टेष्टया लागिं दक्व सामान विदेशं हयेमाःगु जूगुलिं थुकिं यानाः ध्यबा विदेशय् वनीगु बारे नं न्ह्यसः पिहां वयाच्वंगु दु ।