ने. सं. ११४४ कौलाथ्व तृतीया -

मन्त्रिमण्डल विस्तार कन्हय् जक

येँ – माओवादी अध्यक्ष पुष्पकमल दाहालं कन्हय् सोमवाः ३ बजे फुक्कं मन्त्रीतय् शपथ ग्रहण जुइगु खँ कनादीगु दु । प्रेस सेन्टर र प्रेस चौतारी नेपाल चितवन शाखां म्हिगः मंकाः कथं ग्वसाः ग्वःगु पत्रकार सम्मेलनय् न्ववासें वय्कलं उगु खँ धयादीगु खः । मन्त्रीया विषयय् पार्टीइ गुगुं नं कथंया विवाद मजूगु खँ कनादिसें वय्कलं धयादी, ‘म्हीग हे क्वःजीधुंकूगु खः । निगुलिं पार्टी लिसें च्वनाः मिले यायेमाःगुलिं जक छुं खँ ल्यनाच्वंगु खः ।’वय्कलं मिडियाकर्मीतय्त आधिकारिकता बुझे यानाः जक समाचार सम्प्रेषण यायेत इनाप नं यानादीगु दु । आःया मन्त्रिमण्डलय् न्हूपिं व पुलांपिं दुथ्याइगु खँ नं वय्कलं कनादीगु दु । अन न्ववायेगु झ्वलय् वय्कं इतिहासय् महत्वपूर्ण घटना जुइगु यानाच्वंगुलिं सचेत जुइमाःगु खँ नं कनादिल ।

वय्कलं धयादी, ‘कम्युनिष्टतय् सरकार बने जुयाच्वंगु दु, प्रतिक्रियावादी शक्तितय्सं नेपाःया इतिहासय् खास खास इलय् थज्याःगु घटना ब्वलंकेगु यानाच्वंगु दु ।थ्वहे झ्वलय् मन्त्री जुइपिं यक्व पिहां वःगुलिं मन्त्रालयत छगुली मेगु ल्वाक छ्यायेगु व दुगु टुक्रा यायेगु ज्या नं जुयाच्वंगु दु । मन्त्रालयत उखेथुखे यायेगु झ्वलय् विज्ञान मन्त्रालय आः वन मन्त्रालयय् लाः वनीगु जुयाच्वंगु खँ धाःगु दु । थथे जुल धाःसा वन व विज्ञान मन्त्रालय निगुलिं माओवादीयात वनी । प्रधानमन्त्री खड्ग ओलीं थःगु मन्त्रिमण्डलया न्हापांगु लटय् लालबाबु पण्डितयात विज्ञान मन्त्री दयेकाः दुथ्याकादीगु खः । आः वय्कलं पण्डितयात सामान्य प्रशासन मन्त्री दयेकेगु तयारी यानादीगु खँ सीदुगु दु । पण्डित थ्व स्वयां न्ह्यः सामान्य प्रशासन मन्त्री जूगु इलय् हे विदेशय् पीआर कयातःपिं सरकारी कर्मचारीतय्त कारवाही यायेगु पलाः न्ह्याकाः चर्चाय् वयादीगु खः ।