सतक विस्तारयात कयाः बालाजुइ झडप

येँ- बालाजुइ सतक विस्तार पीडित संघर्ष समिति व सतक विस्तार यायेमाः धकाः वयाच्वंपिनि दथुइ झडप जूगु दु ।

उपत्यका सतक विस्तार पीडित संघर्ष समितिया नायः सुमन साय्मिं कनादीकथं अतिक्रमण जूगु जग्गाय् डिभिजन सतक ज्याकुथिं रिटेलिङ वाल दयेकेगु ज्या यानाच्वंगु खःसा म्हीग संघर्ष समितिया दुजः लिसे स्थानीय पीडित जनतां डिभिजन सतक ज्याकुथी रिटेलिङ वाल दयेकेगु ज्या गलत जूगु धासें निवेदन बिउगु खः ।

निवेदन कायादिसें ज्याकू प्रमुख नारायण निउरें थःपिनिगुपाखें गल्ती जूगु स्वीकार यासें वाल दयेकेगु ज्या दिकेगु बचं बिउगु खः । तर म्हिगः न्हिनय् आकाझाकां पुलांम्ह सहरी विकास राज्यमन्त्री रामवीर मानन्धरया किजा मनिकराम मानन्धर, स्वकीय सचिव नारायण श्रेष्ठ व समिर भण्डारीपिंसं हाकनं रिटेलिङ वाल दयेकेगु ज्या न्ह्याकेवं स्थानीय पीडित जनतां उकियात पनेत स्वयेवं निगू पक्ष दथुइ कचमच जूगु खःसा लिपाः वनाः झडपय् परिणत जूगु खः ।

झडपय् निगुलिं पक्षय् घाःपाः जूगु दुसा संघर्ष समितिया निम्ह दुजःपिंत प्रहरीं ज्वना नं यंकूगु दु । झडप लिपा मानन्धर पक्षं बिउगु जाहेरीया लिधंसाय् श्यामकृष्ण प्रजापति व चन्द्र महर्जनयात ज्वना यंकूगु खः । म्हिगः हे सतक विस्तार पीडित संघर्ष समितिं नं प्रहरीइ जाहेरी दर्ता याःगु दु ।

सर्वोच्च अदालतं स्थानीय जनताया छेँ मुआब्जा मबिकं मथुनेत आदेश बियातःगु खःसां मन्त्री मानन्धरं थःगु शक्तिया आडय् स्थानीय जनताया छेँय् थुनेगु ज्या यानाच्वंगु द्वपं स्थानीय जनतां बियाच्वंगु दु । स्थानीय जनतां मन्त्री मानन्धरं थःगु सिनेमा हल बचे यायेगु निंतिं स्थानीयवासीया छेँ थुंगु द्वपं बियाच्वंगु दु ।