येँय् नं रेल ब्वाकेत अध्ययन

येँ – स्वनिगलय् थ्यंमथ्यं २० किलोमिटर ताःहाकःगु मेट्रो रेलया अध्ययन याइगु जूगु दु । मेट्रो रेलया स्वंगू खण्ड मध्ये छगू खण्डया विस्तृत परियोजना प्रतिवेदन (डीपीआर) व निगू खण्डया पूर्व सम्भाव्यता अध्ययन यायेगु तयारी जुयाच्वंगु खँ रेल विभागं धाःगु दु । च्यादँ न्ह्यः हे पूर्व सम्भाव्यता अध्ययन क्वचायेधुंकूगु सातदोबाटोनिसें महाराजगञ्ज खण्डय् विस्तृत अध्ययन प्रतिवेदन तयारी यायेगु ज्या जुयाच्वंगु खँ प्रवक्ता अमन चित्रकारं कनादीगु दु ।

उकिया निंतिं विभागं ठेक्का आह्वान यायेधुंकूगु दु । झिगू किलोमिटर ताःहाकःगु उगु खण्डय् सन् २०११ स कोरियाली पुचलं सम्भाव्यता अध्ययन याःगु खः । उकिया प्रतिवेदनय् उगु खण्डय् रेल चले यायेगु सम्भव दुगु खँ न्ह्यथनातःगु दु । प्राविधिक रुपं सम्भावना दुसां नं थुकिया मेगु पक्षबारे अध्ययन यायेमाःगु खँ धाःगु दु ।

अथे हे खोनांनिसें नारायणगोपाल चोक जुयाः भुइजःसि खण्डय् धाःसा पूर्व सम्भाव्यता अध्ययन जुइ ल्यं दनि । उगु खण्डय् पूर्वसम्भाव्यता अध्ययन याकेत ठेक्का प्रक्रिया न्ह्याःगु खँ प्रवक्ता चित्रकारं कनादिल ।

प्रवक्ता चित्रकारया कथं न्हापा सातदोबाटोंनिसें महाराजगञ्ज तकया खण्डय् जक रेल मार्ग दयेकेगु योजना दयेकूगु खःसा चक्रपथया पिने नं जनघनत्व अप्वया वंगुलिं रेलमार्गयात मेथाय् नं न्यंकेगु योजना सरकारं दयेकूगु खः । वय्कलं धयादी, ‘स्वनिगलय् च्वनीपिनिगु जनसंख्या अप्वःगुलिं शहरी रेल फुक्क थाय् चले यायेमाःगु आवश्यकता जुइधुंकूगु दु ।’