चिनिया ब्रुमर मेगु वालंनिसें संचालन जुइगु

येँ – येँ महानगरपालिकायात चीनया छेन्दु नगरपालिकां बिउगु निगः ब्रुमर संचालनय् हयेत अझं छवाःया ई काइगु जूगु दु । येँ मनपालिसे तःकेहें (भगिनी) सम्बन्ध दुगु चीनया छेन्दु नगरपालिकां छवाः न्ह्यः आइतवाः येँ मनपायात निगः ब्रुमर लःल्हाःगु खः ।

छेन्दु नगरं युरो ५ मापदण्डया ब्रुमर लःल्हाःगु खःसा आः उगु ब्रुमर संचालन यायेगु रुट, उकिया चालक व सहचालक नापं ब्रुमरय् छुं थप यन्त्र जडान यायेमाःगुलिं उकियात संचालनय् हयेत छुं ई काइगु येँ मनपां न्ह्यथंगु दु । येँ मनपा मेकानिकल शाखाया प्रमुख प्रमोद डंगोलं कनादीकथं उगु ब्रुमरय् निगः इन्जिन दु । ८ दशमलव ६ मिटर हाकः व २ दशमलव ५ मिटर ब्या दुगु ब्रुमर चले यायेगु इन्जिनया क्षमता ११८ किलोवाटया जूगु डंगोलं कनादिल ।

उगु ब्रुमरं सतकय् च्वंगु धू मुने न्ह्यः न्हापां धू मब्वयेकेया निंतिं लः छ्वाकीगु व वयां लिपा धू मुनेगु ज्या याइ । सतकया अवस्था स्वयाः प्रतिघन्टा ३ निसें २० किलोमिटर तकया सतक सफा यायेगु क्षमता दुगु ब्रुमरया गति प्रतिघन्टा ९८ किलोमिटर दु । २ करोड २८ लाख तका तूगु उगु ब्रमुरया ताःचा वंगु आइतवाः छेन्द्र नगरया उपप्रमुख निउ छिङ्पाओं येँ महानगरया प्रमुख विद्यासुन्दर शाक्ययात लःल्हानादीगु खः ।

छेन्दु नगरं लःल्हाःगु निगः ब्रुमरलिसें आः येँ मनपालिसे न्हय्गः बु्रमर थ्यंगु दु । थ्व स्वयां न्ह्यः येँ मनपां वंगु बैशाख २७ गते इटालीं न्यागः ब्रुमर हःगु खःसा न्यागलं ब्रुमरं येँया सतकय् च्वंगु धू मुनेगु ज्या जुयाच्वंगु दु ।
येँ मनपा वातावरण विभागया प्रमुख हरिकुमार श्रेष्ठं चीनं बिउगु निगः ब्रुमर मेगु वालंनिसें संचालनय् वइगु जानकारी बियादिसें थौंकन्हय् न्यागः ब्रुमरं न्हियान्हिथं सनिलया च्याताः इलंनिसें सुथसिया प्यताः ईतक थीथी न्यागू रुट क्वःछिनाः ब्रुमर संचालन याना वयाच्वंगु दु । आः संचालन जुयाच्वंगु ब्रुमरं न्हिं १० निसें १२ गू टन तक धू संकलन याना वयाच्वंगु दुसा उकथं संकलन जूगु धू दक्वं टेकुइ व्यवस्थापन याना वयाच्वंगु दु ।

सम्बन्धित बुखँ

LEAVE YOUR COMMENTS