चोलेन्द्र विरुद्ध मुद्दा दर्ता मजू

येँ – प्रधानन्यायाधीश चोलेन्द्र शम्शेर जबरा विरुद्ध नेपाल बार एसोसिएसनं सर्वोच्च अदालत न्ह्यःने याना वयाच्वंगु आन्दोलन पनेत परमादेश माग यासें लाःगु रिट निवेदन दरपिठ जूगु दु । सर्वोच्च अदालतया रजिष्ट्रार नारायणप्रसाद पन्थीं म्हिगः नेशनल इन्डिपिन्डेन्ट लयर्स एसोसिएसनं सर्वोच्च अदालतयात तकं विपक्षी दयेकाः पेस याःगु रिट निवेदनय् दरपिठया आदेश बिउगु खः ।

रजिष्ट्रार पन्थीं याःगु दरपिठय् धयातःगु दु, ‘पेसी व्यवस्थापनया सम्बन्धय् सर्वोच्च अदालत नियमावली संशोधन जुयाः गोला प्रक्रियापाखें पेसी व्यवस्थापन जुयाः नियमित रुपय् सुनुवाइ जुयाच्वंगुलिं तत्सम्बन्धय् बिना आधार, दाबी याःगु व कानुन व्यवसायी परिषद ऐन, २०५० य् दुगु व्यवस्था अन्तर्गतया विषयय् तकं निवेदनं दाबी याःगुलिं उगु विषय थुगु अदालतया अधिकार क्षेत्र दुने मलाःगु जूगुलिं बिना आधार व अधिकार क्षेत्र हे मुगु विषयसं वःगु निवेदन दरपिठ जुइगु आदेश बियाच्वना ।’

नेसनल इन्डिपिन्डेन्ट लयर्स एसोसिएसनं गोला प्रक्रिया लगायत निर्णय बदर यायेत नं माग याःगु खः ।

थ्वहे झ्वलय् म्हिगःहे प्रधान न्यायाधीश जबरा विरुद्ध महाभियोग दायर यायेमाःगु माग यासें दायर जूगु रिट नं सर्वोच्च अदालतं दरपिठ याना बिउगु दु । अधिवक्ता माधवकुमार बस्नेतं दायर याःगु रिट रजिष्ट्रार पन्थीं दरपिठ याना बिउगु खः । उगु रिट नं सर्वोच्च अदालतया क्षेत्राधिकार दुने मलाःगु धासें दरपिठ याःगु खः ।

अधिवक्ता बस्नेतं प्रधानन्यायाधीश विरुद्ध लाःगु द्वपं तसकं गम्भीर प्रकृतिया जूगु धासें उगु द्वपंयात कयाः छानविन यानाः कारबाही यायेत तत्काल पलाः न्ह्याकि धकाः सभामुख व प्रतिनिधिसभाया नामय् परमादेश माग याःगु खः ।

सम्बन्धित बुखँ

LEAVE YOUR COMMENTS