च्वबहाःया प्रवद्र्धन यासें कलाकार

स्वनिगःया उत्पत्तिलिसे स्वानाच्वंगु ऐतिहासिक, धार्मिक व पर्यटकीय महत्वया च्वबहाः थः हे सुन्दर पर्यटकीय क्षेत्र खः । कीर्तिपुर नगरपालिकाय् लाःगु च्वबहाःपाखें खनेदइगु सुन्दर दृश्य लिसे मञ्ज पार्क, न्ह्या वनाच्वंगु बागमती खुसि, खुसि सिथय्सं लाःगु जलविनायक द्यः, च्वबहाः गुँ च्वय् च्वंगु आदिनाथ देगः, गुफा व थ्वया लिक्कसं लाःगु टौदह थः हे धार्मिक व पर्यटकीय महत्वया अनुपम संगम खः ।

च्वबहाःया थ्व दृश्यं कलाकारतय् नुगः मसालीगु ला खँ हे मजुल ।शनिवाः सुथय् हे च्वबहाः थ्यंपिं चित्रकारतय् छपुचःयात नं थनया दृश्यं नुगः साल । चित्रकार राकेशचन्द्र श्रेष्ठ च्वबहाःया दथुइ लाःगु थौंकन्हय् जीर्णोद्धार यानाच्वंगु जलविनायक देगःया आकर्षक चित्र च्वयेगुली व्यस्त जुल ।जल विनायक धयागु स्वनिगःया थीथी गणेद्यः मध्ये छम्ह मुख्यम्ह गणेद्यः खः ।

मौसम सफा जुइबलय् थनं विश्वया सर्वोच्च शिखर सगरमाथा तकं खनेदु धाइबलय् यक्व मनूत अजू चाइ जुइ ।स्वनिगःया कालाकुल हाःसलं मुक्त जुयाः मन शान्त यायेत थन वइपिं यक्व हे दु । फिल्मया सुटिङ्गया निंतिं नं आकर्षक गन्तव्य जुयाच्वंगु च्वबहालय् ल्यासे ल्याय्म्ह ज्वःज्वः वयेगु लिसें ताताःपाकं पिकनिक न्यायेकः वइपिं नं उतिकं हे वयाच्वनी ।

थ्वहे झ्वलय् थ्व शनिवाः चित्रकारतय्सं च्वबहालय् वनाः शनिवारीय स्थलगत चित्रकला कार्यशालाया ग्वसाः ग्वल । झिंच्याम्ह चित्रकार सहभागी कार्याशालाय् लुम्बिनी बौद्ध विश्वविद्यालयया प्राध्यापक कर्ण महर्जनं च्वबहाः ऐतिहासिक, धार्मिक दृष्टिं तसकं हे महत्व दुगु थाय् जूगु खँ कनादिल ।

वय्कःया कथं न्हापा न्हापा स्वनिगः छगू पुखू जुयाच्वंगु खः । च्वबहाःया गल्छीं लः छ्वयेफत धाःसा थन बस्ती दयेकेफइ धयागु निष्कर्ष पिकासें मञ्जुश्री नं चन्द्रहङ्स खड्गं डाँडायात पालाः लः छ्वयेधुंकाः स्वनिगः च्वनेत योग्य भूमि जूगु बाखं दु । थन हिन्दू व बौद्धतय् मिश्रित किंवदन्तीत दुगु खँ नं वय्कलं कनादिल ।

वैज्ञानिक अध्ययन कथं नं ३० हजार दँ न्ह्यव स्वनिगलय् तसकं यक्व लः दुगु खः । च्वबहाः डाँडाया चट्टान कडा व नरम कथंया जूगुलिं लःया सतक थहां वयेवं कमजोर ब्व चुइकायंकल, अले विस्तारं लः म्हो जुया वन । आः स्वयां ११ हजार दँ न्ह्यः लः तसकं क्वय्या तह तक थ्यनेधुंकूगु थुकिया द्वःछि दँ लिपा आः स्वयां १० हजार वर्ष न्ह्यवनिसें धाःसा मानववस्ती दयेधुंकूगु अध्ययनं क्यनाच्वंगु खँ भाजु महर्जनं कनादीगु दु ।

च्वबहालय् नेपाःया ताःहाकःगु गुफा मध्ये निगूगु थासय् लानाच्वंगु गुफा नं दु । ‘जिमिसं थीथी थाय्या नां बिइगु, चित्रकारतय्सं हे मतदान याइ, अले गुगु थाय्या निंतिं अप्वः मत वइ, उकुन्हु शनिवाः उगु थासय् वनाः चित्र च्वःवनेगु यानाच्वनागु दु’ शनिवारीय चित्रकला कार्यशालाया अभियन्त दिवेश प्रधानं धयादिल, ‘थ्व पालय् किपू, च्वबहाः व टौदह मध्ये च्वबाः ल्ययेगु ज्या जुल ।’

प्रधानं मञ्जु पार्कं खनेदुगु बागमति खुसीसहितया सुन्दर दृष्य चित्रय् उतारे यानादिल । वय्कलं च्वबहाःया थःगु हे अस्तित्व दुगु व उकियात सतिकं अनुभव यानाः चित्रकला सयेकेत च्वबहाः वयागु खँ कनादिल ।

चित्र च्वयेत मेपिं चित्रकारत झलकबहादुर खत्री, रामकृष्ण भण्डारी, दीपेन्द्र बनेपाली, राजेन्द्र याकमि, विनोद महर्जन, विक्रम प्रजापति, प्रकाश मानन्धर, दिपना शर्मा, सुष्मा श्रेष्ठ लगायतया चित्रकारत सहभागी दुगु खः ।

‘थुलिमछि कलाकारतय्सं थन वयाः थनया दृश्यया चित्र च्वयादिल, यक्व लय्ता वल’ जलविनायक सामुदायिक वन उपभोक्ता समूहया कोषाध्यक्ष सुजिन्द्र महर्जनं धयादिल, ‘थुकिं च्वबहाःया सम्पदा व आकर्षण प्रवद्र्धन यायेत यक्व ग्वाहालि याइ ।’ चित्रकार राकेशचन्द्र श्रेष्ठ व दिवेश प्रधानया योजना कथं सुरु जूगु स्वतःस्फूर्त अभियानया थ्व झिंछगूगु शृङ्खला खः ।

न्हूपिं, पुलांपिं लिसें कला क्षेत्र त्वःता वनाः नं हाकनं लिहां वःपिं कलाकारत थ्व पुचलं दुथ्याः । वय्कःपिनिगु थ्यंमथ्यं प्यसःम्ह दुजः दुगु फेसबुक समूह दु । वय्कःपिंसं मतदानया हे आधारय् थ्वयां न्ह्यव हनुमानध्वाखा, यल लाय्कू, ख्वप, थिमि, टेकु, गुह्येश्वरी, खोकना, चाँगुनारायण, पुलांगु गुह्येश्वरीइ वनाः थथे हे चित्र च्वयेगु यानादी धुंकूगु दु । अभियन्त्र प्रधानं जिल्ला जिल्लाय् नं थज्याःगु चित्रकला अभियान सुरु जूगु खँ कनादीगु दु ।