नेपाःया पेट्रोल भारतय् तस्करी
येँ – अभावया इलय् सीमा लागाय् च्वनीपिं मनूतय्त ला फाइदा हे जुइगु याः । तर गबलें गबले धाःसा सीमाय् लाःगु हे कारणं अभावया शिकार नं जुइ मालीगु अवस्था वये यःगु जुयावन ।
थौंकन्हय् पर्सा जिल्लाया सीमा लागाय् च्वंपिं मनूतय् थथे हे पेट्रोल डिजेलया अभाव फयेत बाध्य जुयाच्वंगु दु । अन थथे अभाव जूगुया कारण खः, नेपाःपाखें भारतय् चोरी निकासी जुइगु । नेपालय् स्वयां भारतय् पेट्रोल व डिजेल थिके जूगु कारणं थौंकन्हय् पर्साया सीमा लागाय् च्वंपिं पेट्रोल डिलरतय्सं भारतपाखे पेट्रोल तस्करी यानाच्वंगु दु । गुकिं यानाः अनया स्थानीय मनूत न्हिंन्हिं पेट्रोल डिजेलया मार फयेत बाध्य जुयाच्वंगु दु ।
थौंकन्हय् नेपालय् पेट्रोल प्रति लिटर १०३ तकां लाःसा भारतय् करिब १२६ तका (भारु. ७९ तका) थ्यनाच्वंगु दु । अथे हे डिजेल नेपालय् लिटरं ८५ तकां लाःसा भारतय् करिब १०८ तका (भारु. ६८ तका) थ्यनाच्वंगु दु । नेपालय् स्वयां भारतय् थिके जूगु कारणं नेपाः दुहां वयेधुंकूगु पेट्रोल डिजेल तस्करी जुयाः भारतीय बजारय् तुं दुहां वनाच्वंगु खः ।
भारतीय सीमा लिसे स्वाःगु पर्साया बुगकाइ, अमरपट्टी, सोनापुरी आदि गामं पेट्रोल व डिजेल भारतपाखे ब्यापक रुपं तस्करी जुयाच्वंगु लूगु दु । थुकिं यानाः पर्साय् हे पेट्रोल व डिजेलया अभाव जुयाच्वंगु दु ।
स्थानीय मनूतय्सं धाः कथं ट्यांकर वइगु खँ विशेष सूत्रपाखें सीकाः तुरुन्त हे पेट्रोल काः वनेमाः । मवन धाःसा निघौ दुने हे पेट्रोल फुत धाये धुंकी । पेट्रोलया ट्यांकर वयेवं हे मनूतय्सं थःपिनि गाडीइ तयाः भारतपाखे यंकाः मी यंकी । गुलिसिनं ततग्वःगु जर्किन व ग्यालेनय् नं तयाः यंकी । पेट्रोल तस्कर यायेगु थ्व ज्याय् आपालं स्थानीय मनूत संलग्न जुयाच्वंगु दुसा पेट्रोल पम्प सञ्चालकत नं उकी संलग्न दु ।
थ्व ज्यायात प्रहरीं नं खास ध्यान मबिउगु जुयाः तस्करतलिसे प्रहरी नं मिले जुयाच्वंगु द्वपं स्थानीय मनूतय्सं बिया हःगु दु । पेट्रोल काये मखनाः सवारीधनीत हैरान जुयाच्वंगु दुसा डिजेल धाये मखनाः ततःग्वःगु गाडी चले याइपिं जक मखु बुँइ ट्राक्टर चले याये माःपिं किसानत तकं पीडित जुयाच्वंगु दु । इलय् डिजेल मदयाः बुँ पालेगु ज्याय् समेत लिच्वः लानाच्वंगु खँ स्थानीय मनूतय्सं धाःगु दु ।
LEAVE YOUR COMMENTS