यलय् हस्तकला महोत्सव जुइगु
यल – हस्तकला नगरीया उत्सव, कला संस्कृतिया महोत्सव धयागु नारा बियाः वइगु चैत १३ निसें १७ गते तक यलय् वृहत् हस्तकला व साँस्कृतिक महोत्सव जुइगु जूगु दु । थुगु हस्तकला मेलाय् चीनिया संस्कृति अध्ययेतातय्सं नं ग्वाहालि याइगु जूगु दु । निवृत्त प्राध्यापक सु हाओया नेतृत्वय् वःगु चिनियाँ पुचलं वल्र्ड क्राफ्ट काउन्सिलपाखें विश्वया ३५ औं कला नगरी घोषणा जू कथं यल नगरलिसे सहकार्य यायेत इच्छा प्वंकूगु खः ।
थ्व झ्वलय् महोत्सवय् चिनियाँ पुचलं चिनियाँ संस्कृति खनेदइ कथं निगू स्टल तयेगु बारे सहलह नं जूगु खः । चिनियाँ पुचःयात यल महानगरपालिका वडा नं. १६या अध्यक्ष निर्मलरत्न शाक्य यल लायकुलिइ खादा न्ययेकाः लसकुस याःगु खः । थ्व झ्वलय् १६ वडाया लिसें यलया हस्तकला, संस्कृति, धार्मिक दर्शनयान प्रवद्र्धन यायेगु निंतिं निगू पक्षया दथुइ सम्झौता यानाः ज्या न्ह्याकेगु बारे नं सहलह जूगु खँ धाःगु दु ।
वडाअध्यक्ष शाक्यं १६ वडा मूर्त अमूर्त कला, संस्कृतिं जाःगु थाय् जूगु व ६० प्रतिशतं मल्याक वडावासीत हस्तकला व्यवसायी जूगु खँ न्ह्यथँसें वृह कला तथा साँस्कृतिक महोत्सव यायेत्यनागु खँ धयादीगु खः । हस्तकलाय् ग्वाहालिया निंतिं वडा व चिनियाँ पुचः दथुइ समन्वय यायेगु जिम्मा नेपाल हस्तकला महासंघया निर्वतमान अध्यक्ष धर्मराज शाक्यं कयादीगु दु ।
ज्याझ्वलय् न्ववासें निर्वतमान अध्यक्ष शाक्यं विश्वया ३५ औं कला नगर घोषणा जूकथं यलय् आवश्यक ज्या न्ह्याकेगु निंतिं थ्व महोत्सवं छगू माहौल तयार याइगु खँ धयादिल । चिनियाँ पुचलं यल लाय्कूया अवलोकन लिपा बखुम्बहालय् वनाः वाङमय शताब्दी पुरुष सत्यमोहन जोशीयात नं नापलादीगु खः ।
चिनिया पुचःया नेतृत्व यानाः झायादीम्ह प्राध्यापक सुहाओं वाङमय शताब्दीपुरुष जोशी पाखें सन् १९६३ य् चिनय् नेपाली व नेपालभाषा सयेकादीगु खः । उबलय् जोशी नेपाली भाय् स्यनेगु निंतिं पेकिङ्ग झायादीगु खः ।थ्व झ्वलय् जोशीयात शताब्दी पुरुष कथं म्हसिका बीवं सकलें अजूचायाः सछि दँ तक म्वाना च्वनेफुगुया रहस्य न्यंगु खः ।
शताब्दी पुरुष जोशी वइगु वैशाख ३० गते सछि दँ क्यनेत्यंगु दु । यलय् जुइगु महोत्सवय् शताब्दी पुरुष जोशीयात नं विशेष सम्मान यायेगु खँ अध्यक्ष शाक्यं धयादीगु दु । प्राध्यापक सुहाओं नीस्वना तयादीगु द इन्ष्टिच्यूसन अफ लाइफलोजी संस्थाया प्रतिनिधित्व यासें चिनिया पुचः नेपाः भ्रमणय् वयाच्वंगु खः ।
LEAVE YOUR COMMENTS