ने. सं. ११४४ ञलाथ्व दशमी -

विपक्षी मदुगु संसद गथे च्वनी ?

येँ (नेपालभाषा टाइम्स)- राष्ट्रिय जनमोर्चाया अध्यक्ष चित्रबहादुर केसीं बल्लाःगु प्रतिपक्ष मन्त धाःसा सरकार निरंकुश जुइगु खतरा अप्वःगु खँ धयादीगु दु । म्हिगः विश्वासया मतयात कयाः जूगु सहलह ज्याझ्वलय् सम्बोधन यासें वय्कलं फुक्कं दल सरकारय् वनेगु व समर्थन यायेगु लहर न्ह्याःगु व पुलांपिं प्रधानमन्त्रीतय्सं संसद विघटन यायेमाः धकाः धाःगु खँ न्यनाः थः अलमलय् लाःगु खँ नं धयादिल ।

सम्बोधनया झ्वलय् केसीं धयादिल, ‘अजूचायापुगु खँ छु धाःसा संसदीय व्यवस्थाय् प्रतिपक्ष दइ, जिं सिउगु संसदीय व्यवस्था ला थ्व खः, नेपालय् विचित्र छु जुल धाःसा दक्व फुक्कं धइथें सरकारय् ब्वति कायेगु व समर्थन यायेगु खँ जुल । सत्ता पक्षय् च्वनीपिंत थ्व स्वयां हाइसञ्चो मेगु छु जुइ ? जिं थ्व गुगु कथंया समर्थन खः थुइके फयाच्वंगु मदु ।’ वय्कलं थ्व दृश्य ग्यानापुसे च्वंगु धासें थःपिंसं सरकारयात विश्वासया मत बी मफइगु व याकःचा जूसां देय्या पक्षय् ल्वायेगु खँ नं धयादिल ।

उकथं हे नेमकिपां नं न्हूगु सरकारयात विश्वासया मत मबिल । नेमकिपाया सांसद प्रेम सुवालं प्रधानमन्त्री पुष्पकमल दाहालं नागरिकता विधेयक व एमसीसी लगा–यत मुद्दा खारेज यायेगु खँ थःगु मन्तव्यय् स्पष्ट रुपं मतः धासें विश्वासया मत मबीगु खँ धयादीगु खः ।

सांसद सुवालं भ्रष्टाचार, देशद्रोह लगायत गम्भीर अपराधय् दुथ्याःपिं मनूतय्त संविधान संशोधन यानाः जूसां मृत्युदण्ड बीमाःगु व्यवस्था यायेमाःगु माग नं ानादिल । उकथं हे वय्कलं स्वनिगलं फये मफयेक
जनघनत्व अप्वःगु धासें संघीय राजधानी मेथाय् यंकेमाःगु खँ नं धयादिल ।

अथे हे स्वनिगलं नेवाः समुदाय विस्थापित जूगु धासें वय्कलं धयादिल, ‘नेवाः जातिया भाषा संस्कृति ल्यंकेमाः धइगु फुकसिया माग खः । स्वनिगलय् नेवाः जाति विस्थापित जुयाच्वंगु दु, नेवाः मदुगु स्वनिगः गथे जुइ ?’

अथे हे मेखे संविधानविद् डा. भिमार्जुन आचार्यं नं विपक्षी हे मदुगु संसदं नेपाःया प्रजातन्त्र बल्लाकी मखु धयादिल । लोकतन्त्र दुगु देशय् थथे जुइ मखु धासें वय्कलं विपक्षीइ च्वनेमाःम्ह नेपाली कांग्रेस तकं सत्तापक्षय् च्वं वंगुलिं कांग्रेसया लागिं सत्ता व शक्ति हे जक सकतां खः धइगु खँ प्रमाणित जूगु दु धयादिल । थीथी सञ्चार माध्यमतलिसे खँ ल्हासें वय्कलं थ्व बिचाः तयादीगु खः ।