माघं हे चुनावया मिति घोषणा

येँ- निर्वाचन आयोगं थ्वहे माघया न्हापांगु वाःपाखे स्थानीय चुनावया मिति घोषणा याये मालीगु खँ धाःगु दु । निर्वाचन आयोगं आकिवं वैशाख १४ व २२ गते निगू चरण यानाः स्थानीय चुनाव यायेगु प्रस्ताव यानातःगु दु ।

आयोगं म्हिगः प्रमुख राजनीतिक दलया नेतात लिसे सहलह याःगु इलय् प्रमुख आयुक्त दिनेश थपलियां माघया न्हापांगु वालय् निर्वाचनया मिति घोषणा याये मालीगु खँ धयादीगु खः ।

आयुक्त थपलियां न्हय्न्हुया दुने निर्वाचनया मिति घोषणा मयात धाःसा प्राविधिक, व्यवस्थापकीय नापं व्यवहारिक दृष्टिं नं चुनाव यायेत थाकुइगु खँ धयादीगु दु ।

संविधानया धारा २२५ स स्थानीय तहया कार्यकाल निर्वाचन जूगु मितिं न्यादँया जुइगु व कार्यकाल फूगु खुलाया दुने गाउँपालिका व नगरपालिकाया निर्वाचन यायेमाःगु खँ न्ह्यथनातःगु दु । तर ऐनय् न्हापांगु चरणया निर्वाचन जूगु न्हय्न्हुया दुने कार्यकाल शुरु जूगु तायेकीगु धकाः न्ह्यथनातःगु जूगुलिं स्थानीय जनप्रतिनिधिया कार्यकाल जेठ ५ गते क्वचाइगु खँ आयोगं धाःगु दु । वयां लिपा स्थानीय जनप्रतिनिधिया म्याद तने मजिउगु व उमिसं याइगु ज्या नं मेपिसं याये मजिउगुलिं वैशाखय् चुनाव मयासें मगाःगु आयोगया तर्क दु ।

निर्वाचन आयोगं वंगु छुं न्हि न्ह्यः जक प्रधानमन्त्री शेरबहादुर देउवायात नापलासें स्थानीय निर्वाचन वैशाख १४ गते छगू हे चरणय् यायेगु प्रस्ताव याःगु खः । निगू चरण यायेगु खःसा १४ व २२ गते यायेगु आयोगया प्रस्ताव दु ।

आयोगया कथं वैशाखय् यायेमाःगु स्थानीय चुनावया मिति घोषणा यायेगु ज्या लिबायेधुंकूगु दु । निर्वाचन कानुन कथं तयारीया नितिं माःगु १२० न्हु वनेधुंकूगुलिं माघया न्हापांगु पालय् मिति घोषणा यायेमाःगु खँ धाःगु दु ।

आयोगं स्थानीय तहया निर्वाचन इलय् क्वमचाल धाःसा जनप्रतिनिधि प्वनीगु अवस्थाबारे संविधान व कानुनं परिकल्पना मयाःगु, स्थानीय तहया कार्यभार प्रदेश तथा संघीय सरकार न्ह्याकेगु व व्यवस्थापन यायेगु संवैधानिक लिसें कानुनी प्रावधान मदुगु, स्थानीय सरकार सञ्चालन ऐन, २०७४ स जननिर्वाचित पदाधिकारी बाहेक मेगु गुगुं नं कथं स्थानीय सरकार सञ्चालन व व्यवस्थापन वैकल्पिक व्यवस्था सम्भव मदुगुलिं इलय् निर्वाचन यायेगुमाःगु खँय् बः बिउगु खः ।

म्हिगःया बैठकय् नेकपा एमाले, नेपाली कांग्रेस, नेकपा (माओवादी) केन्द्र, नेकपा एकीकृत समाजवादी, संघीय समाजवादी पार्टी, नेमकिपा,
नेकपा (माले), जनता समाजवादी पार्टी, नेपाली जनता दल, नेपाल परिवार दल, लोकतान्त्रिक समाजवादी पार्टी नेपाल, विवेकशील साझा पार्टी, राष्ट्रिय जनमोर्चा व लोकतान्त्रिक राष्ट्रिय राजनीतिक दलया प्रतिनिधितय्सं ब्वति काःगु खः ।

सहलहय् राजनीतिक दलया प्रतिनिधितय्सं वैशाखय् चुनाव यायेगु नितिं वातावरण दयेकेत निर्वाचन आयोगयात सुझाव बिउगु खः । राजनीतिक दलया नेतातय्सं निर्वाचनया तिथि घोषणा याकेगु नितिं सरकारयात पहल यायेगु आश्वासन नं आयोगयात बिउगु दु ।