बजाः अनुगमनयात निरन्तरता, व्यापारीत भागाभाग
येँ(नेपालभाषा टाइम्स)÷येँ महानगरपालिकां दैनिक उपभोग्य वस्तुया बजाः अनुगमनयात हाकनं निरन्तरता बिउगु दु । महानगर उपप्रमुखया संयोजकत्वय् दुगु बजाः व्यवसथापन तथा उपभोक्ता हित संरक्षण समितिं बजाः अनुगमनयात निरन्तरता बिया हःगु खः ।
उपप्रमुखया संयोजकत्वय् दुगु समितिं स्वच्छ व उपभोक्तामैत्री व्यापारिक क्रियाकलापया निंतिं बजाः अनुगमनयात निरन्तरता बिउगु खः । निरीक्षण अधिकृतया नेतृत्वय् दुगु पुचलं अनुगमन यायेगु व्यवस्था जुयाच्वंकथं वंगु शनिवाः पुचलं कालिमातिइ च्वंगु तरकारि बजाःया अनुगमन याःगु खः । महानगरया अनुगमन पुचः वयेवं व्यापारीत व्यापार यायेगु व थःगु पसः त्वःताः भागाभाग जूगु खः ।
खरिद, विक्रीया बिल पेश याये मफुगु, महानगरय् व्यवसाय दर्ता व नवीकारण मयाःगु, तौलकथंया सामग्री व उपकरण नवीकरण यानातःगु क्यने मफुगु थेंज्याःगु समस्या वयेवं व्यापारीत भागाभाग जूगु खः ।
महानगरं निरीक्षण अधिकृत व अनुगमन पुचः दयेकाः बजाःया व्यवस्था स्वयेगु ज्यायात तीव्रता बीगु झ्वलय् बजाःया नियमित अनुगमन यायेगु ज्यायात निरन्तरता बिया हःगु खः । अनुमगनया इलय् खाद्यान्न, तरकारि, मरमसला, दुरु, दुरुं दयेकातःगु पदार्थ, न्या, लालिसें मेमेगु खाद्यवस्तुया मू व गुणस्तरयात स्वयेगु याना वयाच्वंगु दु ।
महानगरं बजाः अनुगमनयात अझ व्यवस्थित यायेगु ल्याखं ‘येँ महानगरपालिका बजाः व्यवस्थापन व अनुगमन विधेयक–२०७७’ जारी याःगु खःसा उकियात समयसापेक्षकथं परिमार्जन यानाः २०७९ लय् संशोधन याःगु खः ।
LEAVE YOUR COMMENTS