मनूया म्हय् फाया नुगःचु प्रत्यारोपण

एजेन्सी- विश्वय् न्हापांखुसी मनूया म्हय् फाया नुगःचु (मुटु) प्रत्यारोपण याःगु दु । बीबीसीयात चिकित्सकतय्सं बिउगु जानकारीकथं अमेरिकाया बाल्टिमोरय् च्वम्ह ५७ दँ दुम्ह डेभिड बेनेटया म्हय् आनुवंशिक रुपं परिमार्जित यानातःगु फाया नुगःचु प्रत्यारोपण याःगु खः ।

युनिभर्सिटी अफ मेरील्याण्ड मेडिकल सेन्टरं बीबीसीयात बिउगु जानकारीकथं थ्व प्रयोगात्मक मुटु प्रत्यारोपण यायेत न्हय्घौ बिउगु खः । नुगःचु प्रत्यारोपण याःगु स्वन्हुलिपा बेनेटया म्हं प्रतिक्रिया बिउगुु दु । थ्व प्रत्यारोपण बेनेटयात म्वाकेगु अन्तिम आशा खःसां बेनेट मेगु गुलि ई तक म्वाइ धयागु स्पष्ट मजूनि ।

नुगःचु प्रत्यारोपण याये न्ह्यः बेनेटं धाःगु खः, ‘थ्व कि सित कि म्वातया अवस्था खः । जिं सिउ थ्व खिउँगु थासय् गोली कयेकूगु खः, तर थ्व हे अन्तिम विकल्प खः ।’ थ्व प्रत्यारोपण मयाःगु खःसा बेनेट सीगु निश्चित जुइधुंकूगु खः ।

युनिभर्सिटी अफ मेरील्याण्ड मेडिकल सेन्टरया चिकित्सकतय्त अमेरिकाया चिकित्सासम्बन्धी निकायं थ्व अपरेशन यायेत विशेष छुट बिउगु खः । नुगःचु प्रत्यारोपण याःगु चिकित्सकतय्गु पुचलं तःदँ न्ह्यवनिसें थुकिया अनुसन्धान यानाच्वंगु खः । नुगःचुया सफल प्रत्यारोपण लिपा युनिभर्सिटी अफ मेरील्याण्ड मेडिकल सेन्टरया शल्यचिकित्सक बाटर््ली पी ग्रिफिथं विश्वय् जुयाच्वंगुु अंग अभावया संकटया समस्या समाधान यायेत छपलाः न्ह्यःने लाःगु धाःगु दु ।

अमेरिकाय् न्हिं १७ म्ह मनू अंग प्रत्यारोपण याये मखनाः सिनाच्वंगु दु । अथे हे थ्यंमथ्यं छगू लाख मनूत अंग प्रत्यारोपण यायेत पियाच्वंगु दु । थ्व हे कारणं यानाः जनावरया अंग प्रत्यारोपण यायेत यक्व न्ह्यःनिसें अनुसन्धान जुयाच्वंगु खः ।

सम्बन्धित बुखँ

LEAVE YOUR COMMENTS