बजेट खर्च मजूगुलिं सतर्कता केन्द्रया चिउताः

येँ – देशय् दुई तिहाई बहुमतया सरकार दुसां नं विकास निर्माणया ज्याय् बजेट खर्च जुइगु क्रम धाःसा न्हापा थें हे म्हो जुयाच्वंगु खँय् राष्ट्रिय सतर्कता केन्द्रं सरकारया ध्यानाकर्षण याःगु दु ।

विकास निर्माणया ज्याय् सरकारं हरेक प्यला प्यलाय् बजेटया गुलि प्रतिशत खर्च जुल धकाः ल्याःचाः पिकाइगु ज्यायात नं आः प्यलाय् छक्वः मयासे हरेक वालय् यायेमाःगु सुझाव समेत राष्ट्रिय सतर्कता केन्द्रं बिउगु दु । सरकारं प्यलाय् छक्वः बजेटया समीक्षा याइबलय् समस्या पिहां वःसा समाधान यायेत तकं ई मगाइगु जूगुलिं बजेटया समीक्षा वालय् छक्वः हे यायेमाःगु सुझाव केन्द्रं बिउगु खः ।

विकास निर्माणया ज्याय् अप्वः बजेट खर्च यायेगु लागिं सरकारं कर्मचारीतय्त निर्देशन बीगु बाहेक मेगु ज्या मयाः धासें सरकारया ज्या यायेगु शैली समेत हिले माःगु खँ नं धाःगु दु।

थौंकन्हय् दकलय् ततःधंगु विकास निर्माणया ज्या जुयाच्वंगु कर्णाली प्रदेशय् स्थानीय जनतायात नं रोजगारी दयेमा धकाः सरकारं मेशिन प्रयोग मयासे फुक्क ज्या मनूपाखें हे याकेगु यानाच्वंगु दु।

थुकिं यानाः विकासया ज्या लिबाःगु व उकिया लिच्वः कथं बजेट नं कम जक खर्च जुयाच्वंगु धासें आः कर्णाली प्रदेशय् नं मेशिन हे प्रयोग यानाः विकास निर्माणया ज्या न्ह्याकेमाःगु सुझाव नंसतर्कता केन्द्रं बिउगु दु। लँ दयेकेगु थेंज्याःगु ज्या याकनं जुल धाःसा उकिया प्रतिफल याकनं प्राप्त जुइगु व थुकिया लबः स्थानीय जनतायात हे दइगु जूगुलिं जनतायात न्ह्याबलें सतक दयेकीपिं ज्यामि जक दयेकेगु ज्या मयायेत नं केन्द्रं धाःगु दु ।